Оршанке район Кугу Ӧрша ялыште илыше кидмастар Владислав Рябининым чылан палат. Владислав Валерьевичын кидыштыже пужат, кӱртньыжат чонан лийыт манам гын, йоҥылыш ом лий шонем.
Кудывечыш пурымо годым мотор беседке шинчалан вигак перныш. Тудым шкешотан полат денат таҥастараш лиеш. Леведышым кучышо пырнялажым туге ойыртемалтшын пӱчкедыме – йомакыш логалмыла чучеш. Пӧрт воктене шогалтыме кӱртньӧ ората-влакым ужын, нунын нерген йодде шым чыте. В.Рябинин кыдыр-кудырго, пеледыш, лышташ дене сӧрастарыме кӱртньӧ настаж дене печым ыштынеже улмаш. Тидлан тӱҥалтышыжат уло. Кугугапкаште кӱртньӧ пеледышлажым уремыште эртен кайыше кажне еҥ ужын кертеш.
Владислав кидпашалан нигуштат профессионально тунемын огыл, чылажымат шке шонен ыштен. Поснак кӱртньым тапташ. А теве пум пӱчкедаш тудым верысе кидмастар Сергей Беляков шӱмаҥден.
– Самырыкрак годым пу гыч пӱчкедаш йӧратем ыле гын, кызыт кӱртньӧ гыч тӱрлӧ ӱзгарым тапташ кумылаҥынам. Утларакшым шкаланем ыштем, но йодын толшылан тореш ом лий. Пу гыч 10 ий пӱчкеденам, но материалын шерге акан улмыжлан кӧра ты сомылым кодаш логалын, а кӱртньӧ дене кумшо ий веле пашам ыштем, – палдарыш В.Рябинин.
Кумданрак — «Марий Эл» газетын
2018 ий 20 апрельыште лекше номерыштыже лудын кертыда.
Л.ШАБДАРОВА.
М.Скобелевын фотожо.
