Йошкар-Ола воктенсе ик сад товариществыште ӱмыр мучкылан наследоватлыме мланде участкем уло. Пошкудем тудым собственностьыш оформитлаш кӱлеш манеш. Молан?
И.Богомолов.
Йошкар-Ола.
Йодышлан Росреестрын Марий Элысе виктемжын пресс-службыштыжо тыге вашештеныт:
– Мланде участкым ӱмыр мучкылан наследоватлыме да моло права дене таҥастарымаште собственностьлан права мланде участке дене пайдаланаш кумдарак полномочийым пуа.
Тидын нерген Россий Федераций Гражданский кодексын 209-ше статьяштыже радамлын возымо. Тудын дене келшышын, закон але правовой акт, моло еҥын закон дене аралыме интересше ваштареш огыл гын, собственник шке погыж дене чыла действийым ыштен кертеш, ты шотыштак – ужален, пӧлеклен, кусарен, завещатлен, арендыш сдатлен але банклан залог шотеш пуэн…
М.ИВАНОВА.