Россий Федераций президентын Юл кундем федеральный округышто полномочный представительже Игорь Комаров Марий Эл, Чуваш Республикла, Нижегородский да Пенза областьла вуйлатыше-влак дене селекторный совещанийым эртарен.
Тушко Марий Эл вуйлатыше Александр Евстифееват ушнен.
Совещанийыште РФ Конституцийыш вашталтышым пуртымо шотышто общероссийский йӱклымашлан ямдылалтме нерген мутланеныт. Полпред палемден: еҥ-влак могай вашталтышым пуртышаш да йӱклымашке кузе ушнышаш нерген чыла уверым палышаш улыт. Тыгак тудо лӱдыкшыдымылыкым эскераш кӱлмӧ нерген ойлен. Совещанийыште административный рӱдерлаште да кугу олалаште избирательный участкылаште видеофиксацийым вераҥдышаш, «шокшо линийым» эртарышаш нерген мутланеныт.
Марий Элыште 533 участковый избирательный комиссий шке омсажым почын. Кажныштыже индивидуальный аралалтмаш средства ситыше, йӱклымӧ пӧлем-влакым ямдылыме годым Роспотребнадзорын чыла темлымашыжым шотыш налыныт.
Марий Эл Республикым вуйлатышын организаций да аналитике виктемжын уверже-влак негызеш Л.КАМАЛЕТДИНОВА ямдылен.
