Кумдан палыме Foam журналын тӱнямбалне эн сай фотограф-влак радамышкыже Россий гыч ик еҥ гына логалын. Тиде – Дима Комаров. А тудо шочынжо, паледа, кушеч? Йошкар-Ола гыч! Да фотографлан улыжат 21 ий.
Кызыт рвезе Санкт-Петербургышто ила. Диман пашаже-влак эсогыл Лондонышто ончыкталтыныт. Тудын снимкылаштыже пӱтынек иктаҥашыже-влакым ужаш лиеш. Тушто ӱдыр-рвезе-шамыч куштат, тӱрлӧ верлаште коштыт, шупшалалтыт…
It’s Nice That изданийлан пуымо интервьюштыжо Дима тыге палемден:
— Российысе молодежный культурын чот кумдан вияҥме жапше эше ончылно манын шонем. Молан манаш гын Российыште ме алят кугурак тукымын темдымыжым шижына. Тыгак ме кугыжанышын пеҥгыде контрольжо йымалне илена. Да тиде простажак огыл. Кучем-влак самырык-шамычлан ынешт полшо але нуным ынешт умыло.
Фотографын чыла гаяк модельже йолташыже-шамыч улыт. Нунын кокла гыч шукынжо – тиде самырык музыкант але сӱретче-влак.
Диман ойлымыж почеш, тудлан кадрыште ӱдыр-рвезе-шамычын шкеныштым тыглайын, простан кучымышт эн тӱҥ, палдара «Лента.ру».
Л.Камалетдинова.
