Икшывым тергаш да эмлаш медицине стационарыш пыштат гын, ава семын мый тудын дене пырля возын кертам мо?
Е.Красильникова.
Йошкар-Ола.
Йодышлан Медведево районысо прокурорын полышкалышыже С.Г.Захарова вашештен:
— Икшыве дене пырля стационарыште лийме шотышто правам «Россий Федерацийыште граждан-влакын тазалыкыштым аралыме негыз нерген» федеральный закон (2011 ий 21 ноябрь) рашемда. Тушто каласыме: ача-ава-влак кокла гыч иктыже але законный представительже йоча дене пырля тудлан стационар условийыште медицине полышым пуымо жапыште медицине организацийыште оксам тӱлыде лийын кертеш. Икшывын мыняр ийготаш улмо шотыш ок налалт.
Икшывын ныл ий теммешкыже, стационарыште икшыве дене пырля вочмыланат оксам тӱлыман огыл. Йоча ончыктымо ийгот деч кугурак гынат, медицине показанийже уло гын, тунамат пырля лийше ача-ава деч малыме верлан, кочкышлан оксам налшаш огытыл. Закон почеш йоча дене пырля лийше ава ден ача икте-весыштым алмаштен кертыт.
С.Носова.
