САМЫРЫК ТУКЫМ ТАЗАЛЫК

Ик мозаике ок сите

Морко районысо Рушродо ялыште илыше Никитинмыт ешыш азап вучыдымын толын: мартыште изирак ӱдыр Ульяналан шучко диагнозым шынденыт – шӱм чер. Операций кӱлеш, уке гын икшыве кола.
Марий Элыште «Эн пиалан айдеме» конкурсым эртарат гын, Галина Никитина икымше верым уто нелылык деч посна сеҥен налеш ыле. Тудо кӱшычын мо пуалтын гын, чылажымат нимучашдымын йӧрата: пашажым (тушко каяш ныл шагат эрденак кынелеш да калык дене тич темше автобусышто шагат наре кудалеш), кум йочажым, пелашыжым… Марийже – инвалидностьышто, туге гынат ватыжлан сурт коклаште мо дене полшен кертеш гын, чыла ышта. Галина шыл комбинатыште арняште куд кече почела ыштыме пельменьжымат моткоч йӧрата! «Но поснак улыжат-укежат ик каныш кечем да уло ешем дене кухньышто пельменьым нерынчаш йӧратем», – манеш шкеже. Тыгай тудо – илыш корныштыжо вашлиялтше тӧрсыр, неле-йӧсӧ ӱмбачак пиалан айдеме! Ульянажлан тыгай диагнозым огыт шынде гын, конешне, эшеат пиалан лиеш ыле…
«Пелашем дене 20 ий пырля илена. Кугурак йоча-влакым, Диана ден Никитам, сӱан деч вара вигак гаяк ыштышым. А 35 ияшем годым эше ик йочалан ош тӱням пӧлеклаш кумылем лекте. Пиалешем. Тыге Уля шочо. Мотор. Весела…» – каласкала Галина.
Кызыт ӱдырлан – вич ий. Кум километрат пеле коклаште верланыше йочасадыш тудым Никита изаже коштыкта. Туштак, медосмотр годым, врач-шамыч Ульянан изи шӱмыштыжӧ ала-могай ситыдымаш улмым шижыныт. Ончыч республиканский больницыш колтеныт, тушто шымлыме деч вара – Казаньыш, кардиолог-влак деке. Нуныжо мартыште ӱдырын шӱм чер дене орланымыжым пеҥгыдемденыт. Петырналтдыме артерийсе корным окклюдер манме дене «тумышташ» кӱлеш. Тудыжо 330 тӱжем утла теҥгем шога. Операцийын суммыж деч посна.
Галина ӱдыржын писын нойымыжым, куржтал савырнымекыже, чӱчкыдын шӱлештмыжым ондакат шижын. Но Ульяна шӱмжӧ тургыжландарымылан нигунамат вуйым шийын огыл, а ачаж ден аваже чылажат тыге серьёзно улмым тогдаенат огытыл. Тыглай йоча, шоненыт. Моло семынак мультикым ончаш йӧрата, Даша лӱман пырысыштым дрессироватла, пазл дене модеш, изи деталь-влакым икте-весылан келыштарен, кугу-у-у сӱретым чумыра.
Ульяна пала, аваже тудым шыжым Казаньыш наҥгайышаш. Больницыш. Да тушто врач-влак шӱмышкыжӧ тумышым шындат: ситыдыме пазлым ешарат да кужу, пиалан илышыжын сӱретшым чоҥен шуктат. Но ӱдыр ача-аважын тидлан оксашт укем огеш пале.
Марий кундемын изи ялыштыже келшен илыше тиде ешлан азапыштым тумышташ чыланат полшена гын, чылажат шке йогынышкыжо пура ыле.
Ульяналан тыге полшен кертына:
• SMS дене, тудым 8910 кӱчык номерыш колтыман (суммым цифр дене ончыктыман); • карт дене – www.dobroe aif.ru.
• банк реквизит-влак: БФ «АиФ.Доброе сердце» ИНН: 77001619391, КПП: 774301001, Банк получателя: ПАО «Сбербанк России», г.Москва, БИК: 044525225, р/с:40703810838090000738, к/с: 30101810400000000225;
• оксан пурымыжым рашемдаш – (916) 941-41-12; (495) 646-57-89 (доб.4554) да dobroe@aif.ru e-mail дене.

Дарья ДОБРЫНИНА, Маргарита ИВАНОВА

Опубликовать в Одноклассники

Добавить комментарий