15 майыште «Доверие» рӱдер (Йошкар-Ола) ойыртемалтше йоча ден нунын ача-аваштлан Ешын кечыжлан пӧлеклалтше кугу пайремым эртарен.
Тиде кечын пуйто кечыжат утыр шыратен ончен, мардежшат ласканрак пуалын, кайыкшат поснак куанен мурен, шудыжат койын ужарген, пеледышыжат утларак тӱзланен… Чылажат – рӱдерыш коштшо-влакын пайремым ик еш семын палемдымышт лӱмеш!
«Доверие» рӱдерын директоржо Ольга Завойскихын мутшо почеш, пайремым попечитель, бизнес аланысе организаций-влакын полшымышт дене организоватлыме, сандене тӱрлӧ, поснак психологический сынан чыла конкурсым, модышым эртарен кертме.
Рӱдерын площадкыштыже йоча ден ача-ава-шамыч семым колыштын, мурым мурен, куштен, батутышто тӧрштылын, модышым нерынчен, асфальтыш сӱретлен, имне дене коштын, сакыр ватым тамлен кертыныт.
Мероприятийыште 200 утла еҥ участвоватлен – тиде «Доверие» рӱдерын учётыштыжо шогышо еш-шамыч веле огыл, тыгак Сомбатхей микрорайонышто илыше-влакат.
Пайремыш толшо калыкым Марий Элым вуйлатыше А.Евстифеевын лӱмжӧ дене правительстве председательын алмаштышыже И.Дравниеце саламлен.
«Ешын тӱнямбал кечыжлан пӧлеклалтше сылне пайремым тыге веселан да иквереш палемдымыда куандара. Кажне айдемын илышыштыже эн тӱҥжӧ – еш, шочмо пӧрт, лишыл еҥ ден йоча-влак. Да эн волгыдо шижмаш – тиде йӧратымаш. Кугыжанышна самырык тукымым воспитатлыме пашалан моткоч кугу тӱткышым ойыра. Но тӱнямбалне ешын акше нерген мондыман огыл. Йӧратымашым, моторлыкым, перкем да иквереш вияҥаш тыланем!» – манын тудо.
Тиде мероприятий Йошкар-Олаште ойыртемалтше йоча-влаклан «Импульс» клубым почмо денат кылдалтын. Рӱдерын директоржо О.Завойских тудын икшыве ден ача-ава-влаклан шӱкалтышым ыштымыжлан моткоч ӱшана. Тыште ача-ава-шамыч шке шочшышт, нунын интересышт, мом ыштен кертмышт нерген утларак пален налын кертыт. Клуб кажне изарнян 15 шагат гыч пашам ышта.
– «Импульс» клубым инвалид йоча ден нуным ончышо ача-ава-шамычлан почмо. Ме тушто нунылан мастер-классым эртараш, театрлашке, музейлашке экскурсий дене коштыкташ, тыгак олана дене палдараш тӱҥалына, – рашемден Ольга Николаевна. – Ача-ава-влакым йоча дене мутланаш, тыгак икшывым эмлаш туныктышо специалист-влак: логопед, дефектолог, психолог, юрист – кӱлыт. Мемнан цельна – ойыртемалтше еш-влаклан чыла шотыштат полшаш.
М. ИВАНОВА
