УВЕР ЙОГЫН

Жапым веле огыл аныклаш полша

Тачысе кечылан еҥ-влак, кугыжаныш але муниципал услугым налаш манын, шкештак ты але вес учрежденийыш документ дене коштыт. Но жапым да оксам аныклаш шонышо-шамыч тидым электрон йӧн дене ыштат. Тидлан  «Госуслуги»лӱмын единый интернет-портал ышталтын. Тудын полшымо дене услугым налме процедуржат ятырлан куштылемын. Тидын нерген Марий Элысе МВД пашаеҥ-влак журналист-шамычым пресс-конференцийыште палдареныт.  

Кугыжаныш ден муниципальный услугым электрон йӧн дене налаш манын, ончыч порталыште регистрацийым эртыман. Кызыт тудын процедуржо эшеат куштылемын. Мом кузе ыштышашым туштак рашемдыме. Тидым лачшымак порталыште ыштен огыда керт гын, паспортым, СНИЛС-ым налын, лишыл МФЦ-ш мияш лиеш. Тудын специалистше-влак 5 минут жапыште тендан электрон цифр кидпалыда дене регистрироватлат. Тунам те тӱрлӧ министерстве ден ведомствын пуымо чыла услугышт дене пайдаланен кертыда. Мутат уке, тидыже жапым чотак аныкылаш полша.

«Госуслуги» порталыште регистрироватлалтше еҥ тудын полшымо дене паспортым,  у да тошто образецан загранпаспортым налын да вашталтен, могай кугыт налогым, штрафым, пошлиным тӱлышаш улмо нерген рашемден да вигак тӱлен кертеш. Тыгак транспорт средствым регистрироватлаш, водительын удостоверенийжым вашталташ да налаш, пенсий накоплений, индивидуальный счётышто оксам мыняр погынымым рашемдаш йӧн лектеш. Йочасадлан дистанционно черетыш шогалаш, врач деке приемыш логалаш талоным налаш, илыме-коммунальный услугылан тӱлаш да молымат ты портал гоч ышташ лиеш.

Тачысе кечылан Марий Элысе МВД 30 наре кугыжаныш услугым пуа да функцийым шукта. Тышеч кумытшо ГИБДД дене кылдалтын, визытше -инфомационнный рӱдер дене, 22-шо — миграций сфер дене. Южо услуго дене еҥ-влак поснак чот пайдаланат. Мутлан, ГИБДД линий дене транспорт средствым регистрироватлат але водительын праважым вшталтат. Миграций дене кылдалтше услуго-влак кокла гыч паспортым, прописке, судитлалтме нерген нерген справке-влакым налше шукемыт.

Пытартыш жапыште ты портал гоч ынде политический репрессийын жертвыже-влакым реабилитироватлыме нерген, тӱрло архив гыч справке-влакымат налаш лиеш. Тидым репрессийыш логалше-влак шкешт, йочашт, тукымышт ыштен кертыт. МВД-н информационный рӱдержын архивыштыже административный радам дене репрессироватлыме спецпоселенец, кулак-влак шотышто материал-влак аралалтыт.

Тений рӱдерыш реабилитаций дене кылдалтше индеш йодмаш рӱдерыш пурен. Кажныжым закон дене келшышын ончен лекме, йодмыштым шуктымо. Закон дене келшышын, реабилитироватлыме еҥ-влаклан репрессий жапыште йомдарыме политический ден гражданский праваштым, воинский званийыштым, наградыштым пӧртылытат, социальный эҥертышым, компенсацийым пуат. Йодмашым пуымо деч вара, реабилитаций дене кылдалтше справке кум тылзе жапыште ямде лиеш. А теве тӱрлӧ архив гыч справкым тылзе жапыште пуат. МВД пашаеҥ-влакын рашемдымышт почеш, пытартыш жапыште кодшо курымын ныллымше ийлаштыже Крым гыч спецпоселенец семын Марий кундемыш колтымо еҥ-влак шотышто архив справкым йодшо-влак ешаралтыныт.  «Госуслуги» портал гоч налме нимогай услугылан оксам тӱлыман огыл.

С.НОСОВА

Опубликовать в Одноклассники

Добавить комментарий