УВЕР ЙОГЫН

Ечыгорно: Еш тукым-влакат ойыртемалтыныт

Кодшо каныш кечылаште У Торъял районышто ече дене таҥасымаш эртен. Тушко 300 наре еҥ ушнен. 

7 ияш марте рвезе-шамыч 1 километрым каеныт. Нунын коклаште  Тошто Торъял йочасад гыч Контантин Чирков, ӱдыр-шамыч коклаште У Торъял поселкысо «Улыбка» йочасадыш коштшо Виктория  Воробьева эн писе лийыныт.

3 километрым эртыше рвезе-влак коклаште финишыш эн ончыч Евгений Полушин (У Торъял школ), ӱдыр-шамыч коклаште Ольга Ершова (Тошто Торъял школ) толыныт.

3 километрым эртыше ӱдырамаш-шамыч коклаште Наталья Соболева (Тушнур), 6 километрым кайыше пӧръеҥ-влак коклаште Станислав Мамаев (Овалже) сеҥышыш лектыныт.

Марий Эл Республикын Олимпийский Советшын кубокшым У Торъял (1-ше вер), Тошто Торъял (2-шо вер) да Кузнеч (3-шо вер) школ-влаклан кучыктеныт.

У Торъял районысо Ӱдырамаш ушемын председательже Лариса  Полушина таҥасымашыш кум тукым дене ушнышо еш-влаклан  сертификатым кучыктен. Тиде  Рыбаковмыт-Полушинмыт, Веденькинмыт-Ерослановмыт, Прозоровмыт-Садовинмыт, Новоселовмыт-Мосуновмыт, Новиковмыт-Соболевмыт лийыныт.

У Торъял район муниципал образований вуйлатыше, Депутат-влак Собраний председатель Евгений Небогатиков «Единый Россий» партий деч таҥасымашын эн кугу ийготан участникшылан, 1941 ийыште шочшо Геннадий Маркович Яриковлан, тыгак эн самырык участникшылан, 2013 ийыште шочшо Дмитрий Новиковлан, Тауштымашым да шарнымашан пӧлекым кучыктен.

Л.Камалетдинова.

Опубликовать в Одноклассники

Добавить комментарий