Доступная среда» логотип дене колташ
Кнопко уло гын, темдалшыжат лектеш
Снимкыште ончыктымо кнопко ден табличке Советский районысо Ӱшнур ял шотан илем администрацийыш да «У илыш» колхоз правленийыш пурымаште шинчамлан пернышт. Иктаж йодыш дене толшо инвалид-влаклан тидыже пеш йӧнаныс! Пашам кузерак ыштымыжым терген, кнопкым темдальым – ваштарешем нигӧ ыш лек. Оҥай, лӱмжылан гына шынденыт огыл дыр манын, кнопкым эше икмыняр гана темдальым – вашмут ыш лий.
Администрацийыш пурышым. Юалге пӧртыштӧ – шып-тымык, но теве пурла лукышто мутланыме гыч шоктыш. Тушко ошкыльым.
– Администраций пашаеҥ-влак субботникыш лектыныт, тыланда кӧ кӱлеш ыле? – комдык почмо омсан кабинет гыч пеҥгыде пӧръеҥ йӱк шоктыш: администраций вуйлатыше В.Басов улмаш.
– «Марий Эл» газетын социальный илыш да тазалыкым аралыме йодыш дене редакторжо улам. Инвалид-влаклан келыштарыме кнопкыдам темдыштым: ваштарешем нигӧ ыш лекат, кӧргыш пурышым…
– А-а-а, тиде кнопко пашам ышта, мый тудым жаплан йӧртенам. Кызыт уремыште волгыдо, кӧ толмо-кайыме окна гыч вигак коеш, сандене инвалид-влакын администрацийыш логалын кертдымышт шотышто кокытеланымаш але иктаж йодыш лектынжат огеш керт, – умылыдымашем рашемдыш Валерий Николаевич.
Йӧра, тыге гын… Вуйлатышын окнаж гыч кӧ толмо-кайыме чынжымак кидкопасе гай коеш, сандене ойлымыжлан ӱшаныде ок лий.
М.ИВАНОВА.
Авторын фотожо.