Марий кугыжаныш университетын тӱҥ корпусшын актовый залыштыже кушкыжмын, 23 январьыште, Депутат кече эртыш.
Тудо тений Российыште увертарыме Доброволецын (волонтерын) идалыкшылан пӧлеклалтын ыле. Мо оҥайже, 1938 ий 26 июльышто, 80 ий наре ончыч, Марий АССР-ын икымше созыв Верховный Советшын икымше сессийже лач тиде полатыште эртен.
Мероприятий тӱҥалтыште Кугыжаныш Погын председатель Юрий Минаков у ийым Российыште увертарыме идалыкын темыжлан пӧлеклен тӱҥалмаш марий парламентын депутатше-влаклан поро йӱлашке савырнен манын палемдыш.
Юрий Александрович эн ончычак тӱнямбалне волонтер толкыным ыштыме историй дене палдарыш, кызыт улшо да чумыралтше-влак нергенат ойлен кодыш.
Марий кугыжаныш университетын ректоржо, Кугыжаныш Погын президиумын членже, Законодательстве шотышто комитетшын председательже Михаил Швецов вузыштышт доброволец (волонтер)-влакын могай направлений почеш да кузе пашам ыштымышт, могай лектышыш шумышт нерген каласкалыш.
Тылеч вара «Протяни руку помощи» социальный проектын поро кумылым ончыктымо акцийже-влак нерген тудын вуйлатышыже Василиса Баскакова, Марий Эл Республикын «Молодежь Марий Эл за будущее страны» региональный волонтер мер организаций вуйлатыше Виктор Маркин доброволец-влакын шуктымо пашашт да ончыкылык шонымашышт нерген, «Розовый одуванчик» самырык-влакын региональный экологический мер организацийыштын проектышт да ыштышаш пашашт нерген аппарат вуйлатыше Анастасия Сабурова палдарышт.
Мероприятий мучаште Юрий Минаков Депутат кечыш ушнымылан чылаштлан тауштыш. А ойлышо-влаклан Марий Эл Республикын Кугыжаныш Погынжын Тауштыман серышыжым кучыктыш.
Любовь Камалетдинова.
