Марий Элыште «Экспресс-кова-влак» социальный проект пашам ышташ тӱҥалын.
Кодшо арнян Звенигово районысо Социально обслуживатлыме комплексный рӱдерыште йочан еш ден проектыште участвоватлыше ший ийготан волонтёр-кова-влак вашлийыныт. Чайым йӱын, кутыркален шинчыме годым нуно йочам кӱчык жап ончаш полшымо йодышым лончыленыт. Проектыште 14 волонтёр-кова ден жаплан нелынрак илыше 7 еш участвоватлаш кумылаҥыныт.
Комплексный рӱдерын психологшо волонтёр-кова-влакым личностный качествышт шотышто тестироватлен. Кажныжлан йочам кӱчык жап ончымо полышым пуымо дене кылдалтше правил-влакан лӱмын ямдылыме памяткым кучыктен.
Йочам кӱчык жап ончымо шотышто йодмаш-влакым рӱдерын граждан-шамычым социально обслуживатлыме пӧлкан социальный паша шотышто специалистше-влак ончат.
Ушештарена: «Экспресс-кова-влак» социальный проектым 2018 ий августышто каҥашаш тӱНалме. Проект «ший ийготан волонтёр-шамычын» неле илыш ситуацийыш логалше, тыгак коча-ковадыме еш-влакын йочаштым ончаш полшаш виктаралтын.Комплексный рӱдерын специалистше-влак дене пырля проектыште участвоватлаш келшыше волонтёр-кова-влакын спискыштым ямдылыме.Тудым неле илыш ситуацийыш логалше да социально-лӱдыкшӧ положенийыште улшо еш-влакым курироватлыше специалист-шамычлан пуымо.
М.ИВАНОВА.
