Волжск оласе краеведений тоштерыште Юлсер кундемысе медик-влакын Кугу Отечественный сар жапысе пашашт нерген выставке пашам ышташ тӱҥалын.
Сеҥымашым воин веле огыл, медик-влакат лишемденыт. Нунын кидышт гоч 22 миллион утла салтак эртен. Сусыр да черле воин-влакым Юлсер кундемысе врач ден медсестра-влакат эмленыт. Нунын лӱмышт нигунам ок мондалт.
Волжан-шамыч поснак А.Андриановскийым, С.Мокринскийым, Л.Овечкиным, Р.Штейнертым, В. Осиповам, Е.Павловам сайын палат. Нунын фронт корнысо пӱрымашышт нерген Волжск оласе краеведений тоштерын экскурсоводшат радамлын каласкала.
Стендлаште медицине пашаеҥ-влакын пайдаланыме арверыштым, тонометрыштым, шприцыштым, жгутыштым да молымат ужаш лиеш. А «Ваш подвиг бессмертен» видеоролик шучко жапыште врач ден медсестра-шамычын пашаштым радамлын ончыкта.
М.ИВАНОВА.
