Москва оласе марий землячествылан негызым пыштыше Юрий Иванович Ерофеевым пытартыш корныш ужатыме нерген кодшо номерыште гына возышна. Эртыше кечылаште Моско гычак вес ойган увер тольо: кужу жап неле чер дене кучедалмыж деч вара, землячествын кызытсе вуйлатышыже Елена Ивановна Минилбаева илыш гыч каен.
«Марий ӱдыр калыкнан тӱвыраж да исторический поянлыкшым арален кодымо, еҥ-влак коклаште кылым пеҥгыдемден толмо пашаш кугу надырым пыштен. Тудо моткоч чолга, илышым йӧратыше, эре ала-куш вашкыше айдеме, чылалан пример семын лийын. Мыланна тудын волгыдын шыргыжалмыже, мемнам ылыжтен шогымо вий-куатше ситаш огыт тӱҥал. Чоныштына тудо ӱшанле йолташ да ушан каҥашым пуаш, полшаш ямде улшо айдеме семын ушеш кодеш. Ме тыйым шарнаш, йӧраташ да ойгыраш тӱҥалына», — возат йолташыже-влак.
Е.Минилбаева газетышкынат Моско марий уверым возен шоген, кылым кучен. Шке пеҥгыде шонымашыж дене ончыко ӱжын. Тыге порын шарналтат тудым палыше редакцийыште ыштыше йолташна-влак. 51 ияш мотор да чолга ӱдырамашын илыш гыч кайымыжлан лишыл еҥже-влаклан чаманымашым каласена.
С.НОСОВА
