Тачысе лаштыкнан унаже – Урал кундемын мастар ӱдыржӧ Валентина ПЕТРУШКИНА. Кызыт тудо Екатеринбург олаште ила, шкеже Красноуфимск район Кугу Тавра ял гыч. Валентина уста кидмастар, марий тематике дене кылдалтше тӱрлӧ оҥай арверым ыштылеш.
– Валя, пашат шкешотан да ойыртемалтше. Тыгай сӧраллыкым ышташ тыйым кӧ туныктен?
– Чылажымат шке гыч тунемынам. Интернетыште ончен, эркын-эркын тӱрлӧ сӧрастарыме ӱзгарым ышташ тӱҥальым. Тӱҥалтыште шибори, сутаж, канзаши йӧн-влакым кучылтынам. Но полимер шун чонем утларак сымыстарен. Эн ончыч чай йӱмӧ кружкам гына ненченам гын, вара тӱрлӧ сылнештарыме арверым ышташ кумылем лектын. Жап эртыме семын пашашкем ойыртемалтше тӱсым пурташ шонен пыштенам. Тыге телефон чехолышто, кулонышто, кружкаште марий тӱр «шочын».
Ончычшо шкаланем да лишыл еҥем-влаклан гына ненченам, кызыт йодмо почешат ыштем. Пашам вес кундемыштат налыт, нуным мый почто гоч колтем. Тыгак кундемышкына концерт дене мийыше артист-шамычланат пӧлекленам.
– Мураш, кушташ йӧратет, икшыветымат марий шӱлышаным куштет. А калык тӱвырам олаште арален кодаш неле огыл?
– Шочмо йылмем палымемлан ача-авам, коча-ковам, школ туныктышо-влаклан тауштем. Жал, кызыт ялысе школыштына марий йылмым огыт туныкто. Тиде чонем моткоч туржеш. Ынде ялыштат шочмо йылмыштым мондат. Олаштыже ойлыманат огыл. Но мый ӱдырем дене марла кутырем, тудлан тӱвырана, йӱлана нерген каласкалем, марий мурым чӱчкыдын колыштына. Шочмо кундемышкем пырля мийыме годым марий концертыш коштына.
– Палем, сӱретлашат мастар улат…
– Тиде чон йодмо паша. Тидлан нигӧ туныктен огыл, адакат шке гыч сӱретлаш тӱҥалынам. Изи годымак. Художественный школыш кошташ ялыште йӧнжат лийын огыл, но сӱрет конкурслаште ятыр гана сеҥышыш, призан верыш лектынам. Очыни, тидыжак мыйым кидпашалан кумылаҥден. Ӱдыремат, мыйым ончен, тиде пашашке эркын ушна. Тыгак тудо сӱретла, йомакым шонен луктеш, мурылан семымат воза.
Кумданрак — «Марий Эл» газетын
2018 ий 18 майыште лекше номерыштыже лудын кертыда.
Лидия ШАБДАРОВА мутланен.
