18 октябрьыште В.Х.Колумб лӱмеш республикысе йоча да самырык-влакын книгагудыштышт лӱмлӧ поэтлан пӧлеклалтше сылнымут-мемориал залым торжественно почыныт.
Тудым почмаште тӱвыра, печать да калык-влакын пашашт шотышто министр Константин Иванов, алмаштышыже Галина Ширяева, поэт, писатель, шанчыеҥ, журналист, тоштер, библиотек пашаеҥ-влак лийыныт.
30 ий ончыч ты лудмыверлан марий поэт-новаторын, Марий комсомолын Олык Ипай лӱмеш премийжын лауреатше В. Х. Колумбын лӱмжым пуымо. 2015 ийыште книгаудо кум пачашан сылне у оралтыш куснен. Таче тудо икшыве да самырык-влаклан веле огыл увер, тӱвыра-просветительский, интеллектуально каныме рӱдерыш савырнен. Санденак нумалме лӱмжым пеҥгыдемдаш, тудын творчествыж дене утларак келгынрак лудшо-влакым веле огыл палдараш манын, тыште тыгай залым почаш кумылаҥыныт. Лудмывер директор Екатерина Ерпылёван палемдымыж почеш, тиде шонымашым тӱвыра, печать да калык-влакын пашашт шотышто министерствыштат сайлан шотленыт да полшеныт. Залым почмо годым министрын алмаштышыже Галина Ширяеван ойлымыж почеш, тачысе кечылан Йошкар-Олаште ынде кок тыгай шарныктыш зал уло. Икмышыжым С.Г.Чавайн лӱмеш национальный библиотекыште икымше марий сылнымут классиклан почмо.
В.Х.Колумблан пӧлеклалтше залыште библиотекын фондшо гыч поэтын тӱрлӧ арверже, фотографийже, серышыже, савыктышыже, тыгак тудын нерген материал-влак чумыралтыныт. Поснак фотографий-влакым ончаш оҥай ыле. Ик пырдыжыште тудын сынжым ончыктышо фотосӱретым да возымо почеламут корнылажым келыштарыме. Тудо тыге йоҥга:
«Возаш кӱлеш чыла нерген да чаплын,
Пытартыш мут еҥ шӱмыш витымеш.»
Поэт лач тыгак шкежат возен, санденак калык ушышто кызытат ила. Зал изижак огыл, сандене поэт нерген тушко шуко экспонатым, материалым чумыраш лиеш. Мутлан, В.Колумбын Йошкар-Олаште илыше тукым шольыжо Вячеслав Александров ты шотышто кугу полышым пуэн. Поэтын икмыняр арвержым ял гыч лӱмын конден. Умбакыжат залым пойдараш шона. Тыгак мемориал пӧлемым почмо дене тунемше-влакланат марий сылнымут дене палдарыше экскурсийым эртарашат йӧн лектеш.
С.Носова.
М.Скобелевын фотожо.
Снимкылаште: сылнымут-мемориал залым почмо годым.
