Россий ДОСААФ-ын регионысо пӧлкажын отчет да сайлымаш погынымашыже эртен.
Тушко чылаже 77 делегатым ончылгоч сайленыт. Тыгак республикысе молодежный политике, спорт да туризм шотышто министрын алмаштышыже Станислав Игошин, Россий ДОСААФ-ын регионысо пӧлкажын Наблюдательный советшын, Марий Эл кучем орган, мер ушем ден образовательный учреждений-влакын представительышт лийыныт.
Погынышо-шамыч пытартыш вич ийысе пашам иктешленыт да тудым сайлан шотленыт. Тыгак ончыкылык вич ийлан пӧлкан советшым да тудын президиумжым, контрольно-ревизионный комиссийым, Россий ДОСААФын визымше погынышкыжо делегатым сайленыт, планым ыштеныт. Самырык тукымым шочмо элым йӧратыме шӱлышеш шуарен толмаште ойыртемалтше-влакым Чап грамот дене палемденыт.
С.НОСОВА