УВЕР ЙОГЫН

Виеш огыт тушко

Кодшо ий мучаште Руш православный черкын Синодшо тынеш пурышо-шамычлан черке календарьыш пурталтдыме национальный лӱмыштымак кодаш лийме шотышто чаракым кораҥден.

 Тидын нерген патриархийын сайтше увертара. Ты йодыш 2017 ий гычак каҥашалтеш. Синодын Черке просвещений да диаконий шотышто комиссийже тыгай иктешлымашыш шуын:  Руш православный черкын верласе (поместный) православный черкылаштыже шукыж вере эше святой-влак радамыш пуртымо шкеныштынат ятыр лӱм уло. Но нуным Руш православный черке кечышотыш пуртымо огыл. Эшежым Библийын йӱлаж почеш, шочшо азалан лӱмым тынеш пуртымо йӱлаште лийше ава-ача шкешт пуат. Тидын шотышто лӱмлӧ святитель-влакат возен коденыт.

Комиссийын иктешлымашыж почеш, тынеш пуртымо годым национальный сынан лӱмым пуаш нимогай чарак уке (мутлан: Иоанн — Джоан, Иоанна — Жанна), тыгак тынеш пуртымо таинствыштат тыгай лӱман еҥ-влак участвоватлен кертыт. Но тидын годым православный кечышотышто улшо национальный сынан лӱм-влакым шонен лукмо у лӱм-влак дене нигузе лугкалаш огеш лий, молан манаш гын нуно православный калык дене йӧршеш кылдалтын огытыл.

Синодын пеҥгдемдымыж почеш, моло верысе православный черкылан традиционныйлан шотлалтше национальный сынан лӱм-влакым нумалше юмылан ӱшаныше-влакым ушташат кӱлеш да тыгак нунылан чыла черке таинствыш ушнаш чаракым ыштыман огыл. Эшежым тыгай еҥ ийготыш шуын да тынеш пураш шонен пыштен гын, шкаланже гражданский лӱмжылан келшен толшын йоҥгалтше православный лӱмым шке ойырен налын кертеш.

С.НОСОВА

Опубликовать в Одноклассники

Добавить комментарий