ПӰСӦ ЙОДЫШ

Вес уремыштат азап…

Общероссийский калык фронтын Марий Элысе пӧлкашкыже Звенигово оласе Новый уремын 7-ше, 8-ше, 9-ше да 10-шо номеран пӧртлаштыже илыше-влак канализацийым шотыш кондаш полшымо йодыш дене лектыныт. Пучын шӱкаҥмыжлан кӧра канализаций вӱд ташла да калыкын участкышкыже йоген пура, вара йыгыжгын ӱпшен шинча.

ОНФ-ын чолга еҥже-влак палемдыме верыш миеныт да канализаций вӱдын Сосновый уремыште верланыше шуко пачеран пӧрт гыч нине участкылашке йоген волымыжым пеҥгыдемденыт.

«Тыгай ситыдымаш кӱшыл тавысе шӱкын коллекторыш логалмыжлан кӧра лиеш. Ӱлыл таве шӱкаҥеш, да шур-шондо-вӱд вартыш чарашке йоген лектеш. Торжо… шуко пачеран пӧртыштӧ илыше-влакын. Кодшо кеҥежым ташлыше йыгыжге вартышым шке вий дене поген налынна, молан манаш гын кӱшыл тавыш спецтехнике лишемын огеш керт», – манын 10-шо пӧртыштӧ илыше Фёдор Караванов.

Звенигово район администрацийын еҥже-влакын мутышт почеш, канализаций системым Новый уремыште пӧртлам чоҥымо деч ончычак шупшмо, сандене тудын корныжым вашталташ огеш лий. Магистраль оласе вӱдканалын балансыштыже. Коммунальный службо-влак калыкын увертарымыж почеш таве-шамычым жапын-жапын эрыктат. Пытартыш гана пеҥгыде шӱкшакым, лапчыкым, модышым монь луктыныт.

ОНФ-ын еҥже-влак дене вашлийын мутланыше-шамыч тиде ситыдымашым шокшо жап толмо марте кораҥдаш кӱлмым палемденыт. Звенигово район администраций вуйлатышын икымше алмаштышыже Сергей Ермолаев калыклан лум шулымо деч вара канализаций коллекторышто ревизийым ышташ, кӱшыл тавым у петыртыш дене петыраш, тыгак шуко пачеран пӧрт гыч лекше канализаций пучыш решотка гай аралтышым шындаш сӧрен.

«Канализаций дене кылдалтше ситыдымаш граждан-шамычын сай средаште илаш праваштым пудырта. Кучемын еҥже-влак дене вашлийын мутланыме дене ситыдымашым кораҥдыме йӧн-влакым муна. Шошым участкылам ончен лекме деч вара шке пӧртлаште илыше-влак сай вашталтышым шижыт манын ӱшаныме шуэш», – палемден ОНФ-ын Марий Элысе пӧлкажын сопредседательже Руслан Гизатуллин.

 М.ИВАНОВА

Опубликовать в Одноклассники

Добавить комментарий