Марий Элыште икымше гана «Мунло-влакын моштымашышт» регион кӱкшытан чемпионат лийын. Тудо «Самырык профессионал-влак» (WorldSkills Russia) таҥасымашын методикыж почеш эрта, но тушто самырык-влак огыл, а 50 ийым эртыше-шамыч мастарлыкым ончыктат. Тыге шукерте огыл участник-влак Йошкар-Оласе строительный техникумышто «Кермычым оптымаш» компетенций дене шкеныштым тергеныт.
Кум кечаш таҥасымашын тӱҥ шонымашыже – 50 ийым эртыше еҥ-влакын профессионал моштымашыштым ончыкташ.
Чемпионатыште чылаже 12 участник лийын. Нунын кокла гыч 8 еҥже чоҥышо организацийла («Казанский Посад» ООО, «Росагрострой» ООО, «КонтинентСтрой»ООО, «Континент» АО, «ПМК-3» АО, «Митра-Плюс» ООО), а 4-ше республикысе строительно-технологический техникумын, Ардысе профессиональный техникумын, аграрно-строительный техникумын, Волжскысо индустриально-технологический техникумын производственный туныктымаш дене мастер-влак. Таҥасымашке погынышо-влакым Марий Эл Образований да науко министерствын профессиональный образований шотышто пӧлкажым вуйлатыше Ф.Яруткина, Паша да калыклан пашавер шотышто департамент вуйлатышын алмаштышыже А.Лазарев, «республикысе чоҥышо-влакын гильдийыштын генеральный директоржо С.Кузнецов, тӱҥ эксперт О.Гладышева саламленыт, сеҥымашым тыланеныт.
Торжественный ужаш деч вара участник-влак эрденак конкурсын заданийже почеш кок тӱрлӧ тӱсан кермыч дене «РЧ» возыман модульым ышташ тӱҥалыныт. Нунын тыршымышт жапыштак техникумышто «йыргешке ӱстел» эртен. Тудыжо, «Кугурак тукым» федерал проект дене келшышын, сулен налме канышыш лекшаш еҥ-влаклан ешартыш профессионал образованийым пуымо йодышлан пӧлеклалтын.
Участник-влаклан заданийым шукташ 8 шагат пуалтын. Иктешлымаш теве могай лийын:
1 вер – Вячеслав Ермаков («ПМК-3» ЗАО-н каменщикше);
2 вер – Виталий Заболотских («ПМК-3» ЗАО-н каменщикше);
3 вер – Валерий Александров («Казанский Посад» ООО-н камещикше).
Тылеч посна ныл еҥ «Профессионализмлан» медальон дене палемдалтын, тиде:
Юрий Иванов («Казанский Посад» ООО-н каменщикше);
Юрий Краснощёков («Росагрострой» ООО-н каменщикше);
Руфина Зинина (Волжскысо индустриально-технологический техникумышто производственный туныктымаш дене мастер);
Антонида Малинина (аграрно-строительный техникумышто производственный туныктымаш дене мастер).
Г.Кожевникова
