Кажне айдеме икте-весе деч мо дене гынат ойыртемалтеш. Икте мураш-кушташ мастар гын, весе сайын тунемеш, кумшо спорт дене кылым куча. А южо еҥлан чылажат пуалтеш.
Лач тыгай улыт Ӱлылсола ялеш шочшо, Пӧтъял кыдалаш школышто тунемше изаж ден шӱжарже Юля ден Антон Тимофеевмыт. Коктынат моткоч поро, весела, ӱшанле улыт.
Юля 5-ше классыште тунемеш, а Антон 6-шо классыште шинчымашым пога. Дневникыштыш лач «визытан» ден «нылытан» отметке гына шерла койыт. Йоча-влак тунеммаште веле огыл, тыгак тӱрлӧ мероприятийлаштат усталыкыштым ончыктат. Эн тӱҥжӧ – спорт дене пеҥгыде кылым кучат: телым ече дене коштыт, кеҥежым куржталыт. А спортлан Юля ден Антоным ачаж ден аваже – Алексей Андреевич ден Лидия Николаевна – кумылаҥденыт. Нунак йочашт-влаклан пример улыт. Шке жапыштыже спорт дене пеҥгыде кылым кученыт.
Лидия Николаевна утаракше ечым пагален, школышто тунеммыж годым урок деч варат таҥасымашлаште вийжым терген. Чап грамот дене палемдалтын, эсогыл пошкудо Татарстан республикыште Олимпийский чемпион Ренат Сафин лӱмеш эртаралтше таҥасымаште ончыл верыште лийын. Алексей Андреевич гын куштылго атлетике дене икымше (взрослый) разряд марте шуын. Тыгак волейбол, баскетбол дене устан модын, а турник эн йӧратыме снарядше лийын.
Юля ден Антон ача-авашт деч почеш ынешт код. Район, республик кӱкшытыштє веле огыл, тыгак пошкудо республикыште эртаралтше спорт мероприятийлаште вийыштым тергат да эреак, манаш лиеш, сеҥыше радамыште улыт.
Кумданрак — «Марий Эл» газетын
2017 ий 9 декабрьыште лекше номерыштыже лудын кертыда.
Н.Васильева, туныктышо.
