Ече тургымым иктешлыме семын Йошкар-Ола воктенысе «Корта» ече базыште икмыняр кече почела таҥасымаш-влак эртышт. Нунын коклаште иктыже – «Надежда». Ты стартыш Марий Элын тӱрлӧ кундемже гыч школышто тунемше изирак ийготан ятыр ӱдыр-рвезе лектын. Эсогыл Киров область гычат уна-шамыч лийыныт. Участник-влак 1, 2, 3 километрыште вийыштым тергеныт, эрыкан йӧн дене таҥасеныт.
Палемдыме кужытым кажныже сайын эртен. Сеҥыше ден призёр-влакым диплом дене палемденыт гын, кажне участниклан спонсор пӧлекым кучыктен.
– Тиде таҥасымаш шукыштлан шкешотан опытым погымо семын лийын. Икте-весым ончен, техникымат шотыш налаш тунемыт, – ойла Волжский районысо Памар кыдалаш школышто физкультурым туныктышо А.Юрков. – Ик жап школыштына спортын ты видше изиш окшакла ыле гын, кызыт уэш вияҥдаш тыршена. Тидын шотышто ече дене тренер Эрик Васильевич Кудрявцевын полышыжо моткоч кугу шӱкалтышым ышта.
25-31 мартыште лач Памар школын тунемшыже-влак (Мария Козлова, Диана Журавлёва, Карина Егорова, Ксения Романова, Вера Малышева, Антон Юрков, Андрей Васильев, Александр Яранцев, Павел Иванов) Марий Элын чапшым Первоуральскыште ече дене всероссийский таҥасымаште араленыт.
– Тушто элнан тӱрло кундемже гыч чылаже 23 команде вийжым терген. Игече пеш сай лийын, ечыгорнат начар огыл. Тыгай кўкшытан таҥасымашке мемнан тунемше-влак икымше гана лектыныт. Коеш: нунылан моткоч келшен, – ойла тренерышт Э.Кудрявцев Мемнан рвезе команде кумшо верым налын, а ӱдыр-шамыч – кудымшым. Мыйын шонымаште, тиде пеш сай результат. Визымше классыште тунемше Мария Козлова чыла ӱдыр коклаште лу эн тале ечызе (8-ше вер) коклаш логалын. Корнылан йоча-влаклан район администраций тӱлен гын, малаш, кочкаш – кугыжаныш полыш. Ача-ава-влакланат кугу тау. Нунак икгай формым налаш полшеныт. Чылаже 14 костюмым ургымо. Ече комплектымат уэмдаш, мазьлан, парафинлан оксам ойыреныт. Икшывышт верч тургыжланат, таза илыш-йўлам кучымаште вуйын шогат. Тыге сай ончыкылыклан, спортышто куандарыше результатлан ўшан уло.
Е.Эшкинина.
