11 октябрьыште Йошкар-Оласе Яков Эшпай уремыште верланыше йочасад гыч 6 ияш кок рвезе йомыныт. Пиалеш, нуным икмыняр жап гыч ола урем дене ошкылмышт годым муыныт. Рвезе-шамыч Строитель урем марте шуыныт улмаш!
Полиций отделыште ача-авашт ончылно икшыве-шамыч иктыжын ачажын паша верышкыже каяш лекмышт нерген каласеныт.
Тиде томаша лийме деч вара ты йочасадым тергаш тӱҥалыныт, каласен Йошкар-Оласе образований управлений начальникын алмаштышыже Елена Кузнецова.
Служебный шымлымаш гын кызытак кая. Тиддеч посна чыла йочасадыш икшыве-шамыч дене инструктажым эртараш темлымашым колтеныт.
Тыгай туткар ынже лий манын, теве мом ышташ темлалтеш:
— ньога-влак дене утларак мутланыман. Йочасадыш да тушеч мӧҥгышкӧ тудо ача-аваже, коча-коваже, иктаж вес лишыл еҥже дене пырля гына каен кертеш манын умылтарыман. Тыгак икшыве тидым палыже да шарныже манын тыршыман: уремыш прогулкыш лекме годым воспитательын разрешитлымыж деч посна нигушкат каяш огеш лий, уке гын тудо туткарыш логалын кертеш. Мутлан, корнышто тӱкен, тошкен, осал шонымашан ӱдырамаш але пӧръеҥ шолыштын кертыт да моло азапат лийын кертеш манын, сайын умылтарыман;
— икшыве садик гыч лектын каен гын, воспитатель тыманмеш вуйлатышылан увертарышаш, вуйлатыше – ача-аважлан, образований управленийыш да полицийыш;
— воспитатель-влак группысо йоча-шамыч деч тудын кушто лийын кертмыж нерген йодыштшаш улыт.
Мумеке:
— образовательный учреждений вуйлатыше образований управлений вуйлатышылан тидын нерген увертарышаш;
— икшывым шке вийышт дене верештыныт гын, тидын нерген полиций пашаеҥ-влаклан каласышаш улыт.
Л.Камалетдинова.
