Марий Элыште янлык ден кайыквусым шотлымо паша мучашлалтын. Тудын лектышыж дене Марий Элын Пӱртӱс поянлык, экологий да йырым-йырысе средам аралыме министерствыжын специалистше-влак палдареныт. Тиде пашам нуно кажне ийын телым эртарат. Кугыжаныш инспектор-влак республикын сонарлыме да республик кӱкшытышто аралыме пӱртӱс кумдыклаште 889 маршрут дене эртеныт. Тудын тӱрыс кужытшо 8683 километрыш шуын. Эртыме корнын параметрже спутник навигатор полшымо денат возалтын. Чумырымо материалым министерствын специалистше-влак иктешленыт, янлык ден кайыквусо чотым рашемденыт.
Вара могай янлык ден кайыквусо шукемын але шагалемын? Мутлан, кодшо ий дене таҥастарымаште шордо 447 вуйлан шукемын. Кызыт тиде янлык 6604 вуй шотлалтеш. Африкан чума чер шарлен кертме лӱдыкшылан кӧра ирсӧснам кодшо ий дене таҥастарымаште пелыж нарылан шагалемдыме, 562 вуй кодын. Тамган пӱчо тыгак шагалемын, 79 кодын. Мераҥ шукем толеш. Марий калыкын мурыштыжо моктымо луй 1868 погынен.
Орымаш чер рывыжым «сола» гынат, тудын чотшо ок шагалем. Тидлан министерствын специалистше-влак шкештат ӧрыт, тудым лӱйкалаш лицензийымат ешарен пуэныт. Кодшо ийын 2367 вуй лийын гын, тенийлан 2729 погынен.
Шурманше визытлан (140), пире кудытлан (97), йос шымле иктылан (126) ешаралтыныт. А теве ур, пушора (хорек) шагалемыныт.
Кайыквусо шотышто сӱрет куандарыше: сузын, кӱдырын, ирмузын чотышт ешаралтын толеш. Ала-могай амал дене музо чот эсогыл 14276 вуйлан шагалемын, 30440 кодын.
С.Носова.
