Россий Минздравын Йоча-влаклан медицине полышым пуышо департаментше ден Азам ышташ полшышо службыжо вияҥме ситыдымаш да хромосом аномалий пренатальный скринингым ий еда эртара. Вич ияш аудитым иктешлыме почеш, Марий Эл Российын эше шым регионжо дене пырля ик эн сай семын палемдалтын.
Ава кӧргысӧ азан медициныже шотышто специалист-влакын ассоциацийыштын Москваште эртыше кумшо съездыштышт Йошкар-Оласе Перинатальный рӱдер пеленысе медико-генетический консультацийым вуйлатыше, Марий Эл Минздравын ава кӧргысӧ азан медицине генетикыже да пренатальный шымлымашыже шотышто тӱҥ внештатный специалистше Татьяна Алексеевалан лауреатын дипломжым кучыктеныт.
Пренатальный диагностике мӱшкыран коштмо икымше триместрыште эртаралтеш. Специалист-влакын задачышт ава мӱшкырыштӧ кийыше азан вияҥмыжым да хромосом аномалийым диагностироватлыме дене кылдалтын. Тиде шымлымаш мӱшкыран ӱдырамашын черле йочам ыштен кертмыжым рашемда.
М.ИВАНОВА.
