Кодшо кечылаште республикыште мошенник-шамыч вич илалше еҥым ондаленыт да чылаже 2 миллион утла теҥге оксашт деч посна коденыт.
Нуно стационар телефонышкышт правам аралыше орган пашаеҥ-влак семын йыҥгыртеныт да лишыл еҥышт корно туткарыш логалын манын шойыштыныт. Тыгодым ӱшандареныт: пуйто тыге лиймаште эргышт, ӱдырышт, уныкашт… титакан да сусыргышо-влакат улыт. Уголовно мут кучаш ынышт шогалте манын, оксам тӱлаш кӱлмӧ нерген каласеныт. Ӧрткышӧ ача-ава, коча-кова-влак, ӱшанен, телефон йыҥгыр деч вара мӧҥгышкышт толшо курьерлан оксам пуэн колтеныт.
Тыге 90 ияш коча, тукым шольыжым утараш шонен, ондалыше еҥлан 1 миллион теҥгем кучыктен! Уныкажым утарен кодышашлан тынар оксамак 84 ияш кова «пӧлеклен». 86 ияш пенсионеркат тиде оптышышкак логалын да 200 тӱжем теҥгеж деч посна кодын.
А вич еҥ кокла гыч коктынжо шоякым ышташ тӧчышӧ-влаклан ӱшанен огытыл да ондалалтме деч утлен кодыныт.
МВД пашаеҥ-влак темлат:
кугырак ийготан лишыл еҥ-влак дене профилактике сынан мутланымашым эртарыман да мошенник-шамычын кузе ондалаш тӧчен кертмышт нерген палдарыман;
телефон дене йыҥгыртен але смс дене пуйто лишыл еҥ туткарыш логалын манын каласат да тудым утараш оксам йодыт гын, палыман: тиде мошенник-шамыч улыт! Сандене нунын дене мутланымым вигак чарныман да могай лишыл еҥ нерген ойленыт, тудлан йыҥгыртыман.
Л.Камалетдинова
