Военкоматыш мийдымылан могай амалым уважительныйлан шотлат?
А.Смирнов
Краснооктябрьский посёлко.
Йодышлан Медведево районысо прокурорын алмаштышыже А.А.Пекшеев вашештен:
— Повесткыште жапым да верым ончыктымо гын, гражданинын военкоматыш мийымыже тудын обязанностьшылан шотлалтеш. Уважительный амал деч посна гражданин тидым ыштен огыл гын, тугеже тудо военный службо деч шылаш точышылан шотлалтеш да РФ Законодательстве дене келшышын мутым кучаш тӱҥалеш.
«Воинский обязанность да военный службо нерген» Федеральный Закон дене келшышын, военный комиссариатыш мийыдымылан тыгай уважительный амал-влак лийын кертыт:
1. Гражданин черлан але сусыргымылан кӧра пашам ыштен кертдыме лийын гын;
2. Ачажын, аважын, пелашыжын, ӱдыржын, шочмо изажын, шочмо акажын, кочажын, коважын але гражданиным эргылыкеш налше-влакын тазалыкышт пеш начар але нине лица-влакым тойымаште лийын гын;
3. Гражданинын кумылжо деч посна кугу туткарлан кӧра лекше чарак але вес тӱрлӧ обстоятельстве (мутлан, стихийный бедствий) уло гын.
Тиде перченьым эше шуяшат лиеш, молан манаш гын призывной комиссий, воинский учётыш шогалтыме шотышто комиссий але суд моло амалымат уважительныйлан шотлен кертыт. Но кеч-могай амалжымат призывник документ дене пеҥгыдемден кертшаш. Уважительный амал мучашлалтмеке, гражданин угыч ӱжмо деч посна вигак военкоматыш мийышаш.
С.Носова ямдылен.
