«Марий Элыште ыштыме» знакым республикнан эн сай сатуштыжо вераҥдаш тӱҥалыт.
2019 ий 1 мартыште Марий Эл Республикыште Стандартизаций, метрологий да шымлымаш кугыжаныш региональный рӱдерыште «Марий Элыште ыштыме» сату знакым кучылтмо радам теме дене семинар-совещаний эртен. Тушто Ялозанлык да продовольствий, Промышленность, экономически вияҥмаш да торговльо министерстве-влакын, «Марий ЦСМ» ФБУ-н, Торгово-промышленный палатын да республикысе агропромышленный комплекс предприятий-влакын еҥышт лийыныт.
«Марий Элыште ыштыме» сату знакым ямдылыме да регистрироватлыме дене кылдалтше шуктымо паша нерген ялозанлык да продовольствий министр А.Гречихо каласкален. Знакым ямдылымаште да регистрироватлымаште тыршымыштлан Ялозанлык да продовольствий министерствын Тауштымашыжым «Студия 158» компаний» ООО-лан, Торгово-промышленный палатылан да «Марий ЦСМ» ФБУ-лан кучыктымо.
Семинар-совещанийыште «Марий Элыште ыштыме» знакым налме да кучылтмо радам дене кылдалтше йодыш-влакым каҥашыме. Ончыктымо знакым аккредитоватлыме лабораторийыште органолептический ден физико-химический показатель-влак дене лабораторный шымлымашым эртыше продукций-шамыч гына палемдалташ правам налыт. Тидыже сатун эн чапле качестван улмыжым пеҥгыдемдаш тӱҥалеш.
Знакым кучылташ правам налше организаций-влак шке ямдылыме сатуштым Россий Федераций кумдыкышто, тыгак экспортышто утларак чулымын, кумдан ужалаш тӱҥалын сеҥат.
«Марий Элыште ыштыме» бренд Марий Эл Республикыште ямдылыме эн чапле качестван продукцийлан гарантийым пуа.
Россий кӱкшытыштє брендын презентацийже 2018 ий октябрьыште Москваште «Шӧртньӧ шыже» 20-шо агропромышленный выставкыште, тыгак Россий Федерацийын Федеральный Погынымашыжын Федераций Советыштыже Марий Эл Республикын кечыже-влакым эртарыме годым лийын.
«Марий Элыште ыштыме» сату знакым налшашлан сертификацийым ямдылаш йодмашым «Марий ЦСМ» ФБУ-што налыт, а тиде знакым кучылташ правам Торгово-промышленный палатыште регистрироватлат.
В.Смоленцев
