Звенигово район администрацийыште ужармужо дене кучедалме шотышто ведомство-влак кокласе комиссийын заседанийже эртен.
Тушто Провой кундемысе ял ден ола шотан илемлаште ужармужо дене черланыме деч профилактике шотан пашам эртарыме йодышым лончыленыт. Туберкулёз шотышто эпидемийын сӱретше дене Звенигово районысо рӱдӧ эмлымверын врач-фтизиатрже Р.Федорова палдарен. Черын вияҥаш тӱҥалмыжым рашемдыме да пациент-влакым амбулаторийыште эмлыме нерген Красногорский эмлымверын тӱҥ врачше Н.Янгелова, Шолэҥер ФАП-ым вуйлатышын алмаштышыже Т.Аниканова, Химзавод ФАП-ым вуйлатыше Э.Иванова каласкаленыт. А ветеринар лечебницын тӱҥ врачше Н.Петров ужармужын сурткайык ден вольыкым авалтыме ситуацийым радамлен.
2019 ийын икымше пелыштыже районышто ужармужын чыла формыж дене шым еҥ черланен, а кодшо ий тыгаяк жап гыч таче кече марте – 13 еҥ. Тиде показатель туберкулёзын кок пачаш наре (1,9) вияҥмыжым да шарлымыжым пеҥгыдемда. 12 пациент шӱлымӧ органын ужармужыж дене орлана, икте – кутан-эрдылу йыжыҥ туберкулёз дене. Черланыше-влак радамыште коктынжо школышто тунемыт, моло кугыеҥ кокла гыч кудытынжо пашадыме улыт, коктын – сулен налме канышыште, эше коктын пашам ыштат, ик ӱдырамаш – декрет отпускышто.
Икте гына куандара: тений ужармужын лӱдыкшӧ формыж дене черланыше уке, тыгак тиде чер деч ош тӱня гыч кайыше-влакат лийыныт огытыл, но… Туберкулёз дене черланыме чот йоча-влак коклаште кугемын. Кызыт кандаш да латик ияш кок рвезе Йошкар-Оласе специализироватлыме медицине тӧнежыште эмлалтеш.
Заседанийыште мутланымым иктешлыме семын, калыклан эше ик гана ушештарыме шуэш: илышыште тазалык эн шерге, сандене тудым тергаш жапым муашак тыршыза.
М.ИВАНОВА
