Волжск олаште илыше Владимир Карпов марий орнаментан кӱзанӱштым ышта. Шкалан ӱшталаш, пӧлеклан, чынжымак, сай наста.
Владимир 36 ияш. Шкеже Ульяновскышто шочын-кушкын, вара Вологда областьыште кужу жап илен. А кодшо шыжым тудо Юл кундемыш, аважын шочмо верышкыже, йӧршешлан илаш куснен. Шкенжын ойлымыж почеш, ийгот ешаралтме дене чонем, ушем дене марий улмем утларак шижаш тӱҥалын, марий калыкын историйже, тӱвыраже, йӱлаже нерген интернетыште утларак материалым кычалеш, шымлаш тырша. Аважын шочмо ялышкыжат миен коштын. Ынде ачажын шочмо ялышкыже савырнен толаш шона.
В.Карпов коваште гыч тӱрлӧ настам ышта: кӱзануштым, чондайым, картхолдерым, обложкым… Марий Элыш илаш куснымо ден пырляк марий орнаментан кӱзануштыжым ышташ кумылаҥын.
С. Носова
Снимкыште: В.Карпов.
