Марий Элыште «Ший вӱд» флешмоб – экологий акций эртыме нерген увер Марий Элын Тӱвыра, савыктыш да калык паша шотышто министерствыжын сайтыштыже савыкталтын ыле. Тидын нерген меат газетыштына возенна…
Акцийыш кажне кумылан еҥ але тӱшка ушнен кертын. Шке кундемыште памашшинчам, воктенже торым эрыкташ, йырже кумдыкшым тӱзаташ флешмобым эртарыше-влакым ӱжыныт. Ыштыме паша нерген #серебрянаяводамарийэл хештег дене соцкыл лаштыклашке уверым вераҥдаш кӱлын. Экологий акций 1 июньышто тӱҥалын да 15 июль марте шуйнен.
Флешмоб кузе эртыме нерген пален налаш манын, интернетым шерын лектым. Паледа мо, ыштыме паша нерген увер уке гаяк. Лач кок вере памашшинчам эрыкташ лектыныт: Советский районышто – Ургаш тӱвыра пӧртын «Ӱжара» ансамбльжын участникше-влак да Морко районышто – Кораксола школын тунемшыже-влак. Тылзат пеле изиш уке жапыште моло вере тӱзатыме паша вораҥын огыл. Лишыл жапыште организатор-влак тудым садак иктешлат, очыни.
Тыгай акцийым эртарыме нерген шонымашыже моткоч сай, лектышыже гына кызытеш уке манман. А тудо мучашкат лишемын. Очыни, ончыч организатор-влаклан участник-шамычым суапле пашаш ушнаш кумылаҥдыме йӧным кычалман ыле. Министерствын уверыштыже организатор семын «Наше слово» дирекций» манын ончыкталтын. «Мемнан мутна» проектым В.М.Васильев лӱмеш Йылмым, сылнымутым да историйым научнын шымлыше марий институтын шанчызыже-влак илышыш шыҥдарат. Пресс-службынак увертарыме почеш, кажне ийын марий йылме гыч ик шомакым ойырен налын, тудым идалык мучко брендыш савыраш манын, тӱрлӧ семын рекламироватлаш тӱҥалыт. Тенийлан тыгай шомакшылан «ший» мутым ойыреныт. Марий йылмыште «ший» мутлан кызыт ышталтше марий йылме эпитет мутерыште 45 лаштык ойыралтеш, увертареныт шанчызе-влак шкешт. Ты мутышто акрет марий код-влак аралалтыт, маныт. Таклан огыл марий калык ожнысек шийым шӧртньӧ дечат коч пагален. Сылнымутчо-влакат ты шомакым пеш чӱчкыдын кучылтыт. «Мемнан мутна» проект кышкарыштак ший гыч ыштыме сылнештарыш ончерымат эртарышаш нерген увер шоктен.
Но « Ший вӱд» флешмоб декак пӧртылына. Можыч тудым конкурс семын эртараш утларак келшен толеш ыле. Посна проект семын грант конкурсланат тудым эртарыме шонымашым ямдылаш лиеш ыле, очыни. Таче тидлан чыла йӧн уло. Кумылаҥдыше премийым ышташ грантымак кучылташ лиеш. Шарналтеш, шке жапыште, «Марий ушем» организацийым Ираида Степанова вуйлатыме годым, «Памашшинча» конкурсым эртарышт. Тунам тушко, йоҥылыш ом лий гын, 30 утла йодмаш кажне гаяк район гыч пурен ыле. Уло республик мучко памашым тӱзатыме паша ылыж кайыш. Эсогыл Йошкар-Олаште илыше азербайджан-влак Шернур кугорнысо ик памашым тӱзатен шындышт. Кызытат тудым нунак шотышто кучаш тыршат. Кокымшо верым тунам нальыч. Мый журналист семын жюри еҥ-влак дене ыштыме пашам аклаш коштынам. А сеҥыше верыш лекше-шамычлан Ираида Степанова шкежак спонсор-влакым кычалын. Эшежым конкурсым иктешлыше кугу мероприятийымат тудо нунын полшымыж денак пеш сайын эртарен кертын. А таче тыге толашаш нимолан. Тидлан тӱрлӧ кӱкшытан грант конкурс-влак ситышын улыт. Шонымашым гына шонен сералташ да иктаж-могай НКО лӱм дене куш кӱлеш, тушко колташ…
«Ший вӱд» акцийым организатор-влак флешмоб манын лӱмденыт. Ты анличан шомак, пеш вашке чумыргышо тӱшкан ончылгоч палемдыме акцийым эртарымым, але еҥ-влакын пеш писын погынен да ончылгоч кутырен келшыме пашам шуктымым ончыкта. Марлаже, очыни «вӱма» йӱла манме келшен толеш. Сандене марий «вӱма» йӱлана мондалтеш манашат лиеш, ала тудым йот йылме шомак дене лӱмдымыжӧ калыкым поро пашалан кумылаҥден кертын огыл. Пандемий жапыште шуко мероприятийже, акцийже виртуально эртат, «Ший вӱдат» онлайн режимыште эртыме гай чучеш.
Светлана Носова
