Звенигово олаште «Тендан деч посна шот ок лек!» социальный кампаний кышкарыште ГИБДД пашаеҥ ден 1-ше №-ан школышто тунемше-влакын ача-авашт йолешке-шамычын лӱдыкшыдымылыкыштым вияҥдаш полшышо поро пашам ыштеныт.
Нуно школ деч тораште огыл верланыше кугорным вончымо верыш корно движений правил-влакым эскераш кӱлмӧ, лӱдыкшӧ кумдыкыш логалме нерген шижтарен возеныт. Ынде школышто тунемше-влак кугорным вончымышт деч ончыч «Куржын ит вончо!», «Икшывым кидше гыч нал!», «Шеклане!», «Наушникетым кораҥде!» да моло сынан шижтарен возымым лудыт.
М.ИВАНОВА
