Автомобиль ораван тошто покрышкылаж гыч сад-пакчазе-влак мотор деч мотор клумбым ыштат. Мастар кидан-влак тӱрлӧ фигурым, модышым пӱчкеден, садвечыштым, кудывечыштым сӧрастарат. Ош йӱксыжак мом шога! Школ спортплощадкыштат тӧрштылаш кӱнчен шындыме. Мыйынат икмыняр тыгай клумбем уло. Мут коштеш, садпакча гыч покрышкым чыла кораҥдыман. Чыла тиде моторлыкым кораҥдаш, пытараш перна мо?
Зоя ПЕТРОВА
Параньга район.
Россий закон почеш, автомобиль шиным ыштыме резине нылымше класс лӱдыкшан отходлан шотлалтеш. Экосистемылан, пӱртӱслан тӧрлаш лийдыме кугу эҥгекым кондышо вещества-влак тыгай отходлан шотлалтыт. Автомобиль резине 130 ий гыч гына шӱын пыта. Покрышке ырен йӱлаш тӱҥалеш гын, резине южыш пеш аяр парым луктеш. РФ экологий да пӱртӱс ресурс министерствын специалитсше-влакын умылтарымышт почеш, тудо чот шокшо игечыштат ырен кертеш. Сандене тошто оравам клумбым, тӱрлӧ декоративный фигурым, шкешотан печым ыштымаште кучылташ чарыме. Пакчаштыда, палисадникыштыда, школ площадкылаште южо вере кызытат вашлиялтыт – кушто гына автомобиль покрышке уло – кӱнчен луктын, утилизацийыш колтыман. Уке гын, КоАП-ын 8-ше статьяжын 1 лончыж дене келшышын, 1000-2000 тӱжем теҥге штрафым тӱлашда перна. Роспотребнадзор инспекторын кӱштымыжым идалык мучко огыда шукто гын, 2000 -3000 теҥгем тӱлаш ыштат. Тылеч посна, покрышкым шке семын мландыш ураш ок лий, тидат законым пудыртымылан шотлалтеш да тыгаяк штраф вуча.
Вара кушко сдатлыман? Кызытеш чыла вережак огыл гынат, южо шиномонтажыште налыт. Шоныман: закон лектын гын, утилизаций пунктат лийшаш, верысе кучем тиде пашам виктарен колташ лишыл жапыште йоҥым муэш.
Тиде вашмутым тыланда, З.Петрова йолташ, интернетысе уверла гыч ямдылышна. Марий Элыште регионысо кугыжаныш экологий надзорышто вашештышт: Россий Федерацийыште тыгай закон лектын гын, тугеже тудо вийым налын. Сандене покрышке гыч у арверым, клумбым ида ыштыл, тоштыжымат кораҥдаш ямдылалтса.
Л.СЕМЕНОВА ямдылен
