Руш географический обществын, «Моя Планета» телеканалын да «Маяк» радиостанцийын иквереш увертарыме «Эн сай гид» всероссийский конкурсышт эркын мучашке лишемеш. Тушко ушнаш шонышо-шамыч эше вараш кодын огытыл.
А тидлан кажне кумылан еҥ кок минуташ видероликым войзышаш. Тиде ола, тоштер але пӱртӱс кумыдык нерген сайын, оҥайын палдарыше мини- экскурсий лийшаш. Сандене тидым изирак ийготан-шамычат ыштен кертыт. Тидлан кӧрак сеҥышыжымат икмыняр номинацийыште палемдат: «Эн сай гид. Тоштер», «Эн сай гид.Ола», «Эн сай гид.Проводник», «18 ияш марте эн сай гид». Тыгак «Моско гид» посна номинацийыште элнан рӱдолаж нерген палдарыше участникым ойырат. Ямде сюжетым лучшийгид.рф (http://лучшийгид.рф) сайтышке вераҥдыман.
Марий Эл гыч кызытеш ик участник веле, тиде — Александр Акилбаев. Тудо Килемар районышто эртыше «Кугезе мланде» фольклор да этнографий фестивальыште лийын да тудын ойыртемалтше сынжым шке видероликыштыже почын пуэн. Александр мыланна республикысе сылне верла нерген видефильмым войзышо автор семын палыме.
Конкурсышто сеҥыше-влакым Руш географический обществын сентябрьыште эртышашлык фестивальыштыже палемдышаш улыт. Тудо Москосо «Зарядье» паркыште лиеш. Ончыктен кодыман: кугурак ийготан-влалан номинацийыште сеҥыше-влаклан палемдалтше премийын кугытшо — 100 тӱжем теҥге, а 18 ийыш шудымо номинантлан видеокамерым кучыктат.
С.НОСОВА.
