Кристина КУТУЗОВА дене республикысе Пеледыш пайремыште палыме лийынна. Тудо «Марий ӱдыр» конкурсышто шкенжым пеш чолган ончыктен, мастарын муралтен-кушталтен пуымыж дене ойыртемалтын. Тыгак шке кундемысе калык вургем дене палдарымыж годым молын семын кызытсе жаплан келшен толшым огыл, а марий ӱдырамашын тошто тувыржым чиен лектын.
— Кристина, «Марий ӱдыр» конкурсышто шкендым ойыртемалтшын ончыктенат. Очыни, тый артистлан тунемат?
— Мый Марий Турек район Лоп ялын ӱдыржӧ улам, кызыт Палантай лӱмеш тӱвыра да сымыктыш колледжыште дизайн отделенийыште тунемам. Сӱретче але дизайнер лияш ямдылалтам.
— Тыге устан мурет, куштет, молан лач сӱретчын корныжым ойыренат?
— Сӱретлаш шке кумылаҥынам. Утларакшым пӱртӱсым радынаш «велаш» келша. Ом шылте, туныктышат, эмлышат, артистат лияш шоненам, но дизайн пӧлкаш пурен кертмем моло шонымашем шеҥгекырак шӱкалын. Ты профессий кӧргӧ шонымашем калыклан луктын ончыкташ йӧным пуа, садлан тудо мылам лишыл. Тыгак Йошкар-Олаште эртыше «Космос» сӱрет конкурсышто гран-прим налмат могай профессийым ойырымо шотышто кугу шӱкалтышым ыштен.
— Коеш, тый спорт денат пеҥгыде кылым кучет…
— Школышто тунеммем годым Марий Турек районышто ече дене танасымаште кумшо верым налынам, тыгак рӱдоласе ссуз-влак кокласе ече дене куржмаште кумшо лийынам. Волейбол денат модам, коньки денат мунчалташ йӧратем.
— Тыйын йоча-влакым сӱретлаш туныкташ шонымашет лийын огыл?
— Ӱмаште Арбор тӱвыра пӧртыштӧ вожатый семын пашам ыштенам. Икшыве-шамыч дене тӱрлӧ модыш дене модынна. Туштак нуным сӱретлаш туныкташ йӧн лийын. Йоча-влак дене пашам ышташ моткоч келшен, нуно шокшо кумылышт дене пайлалтыт.
— Конкурсышто марий ӱдырамашын ожнысо тувыржым чиен лектынат ыле. Тиде вургемым тый ала-кӧн деч налынат але еш шондык гыч лукынат?
— Тиде тувыр ешыштына тукым гыч тукымыш аралалт толеш. Тудым эше кугезе ковам самырык годымжо чиен. Мый шкежат марий шӱлышан улам. Кызыт олаште илем да марла мутланыме чотак ок сите, сандене йолташем-шамыч дене эре марла кутыраш тыршем. Мыйын шонымаште, шочмо йылмым нигунам да нигуштат мондыман огыл.
Лидия ШАБДАРОВА.
М.Скобелевын фотожо.
