Марий Элыште сайлымашым лийшылан шотлымо. Тидын нерген Республикын Рӱдӧ сайлымаш комиссийжын председательже И.Татаринова ойлен. Кодшо кугарнян комиссий 10 сентябрьыште Марий Эл Республик вуйлатышым жап деч ончыч сайлымашлан официальный иктешлымашым ыштен.
Документ-влакын закон почеш илышыш пурымекышт да инаугураций деч вара Марий Эл Республик вуйлатыше Александр Евстифеев лиеш. Сайлымаште тудо эн шуко, 208 855 йӱкым, поген.
ЦИК-ын заседанийыштыже тудо коллегыже-влакым сайлымаш дене кылдалтше пашаште, сайлыше-влак дене шкеныштым сайын кучымыштлан, Российын да Марий Элын законодательствыштым пагалымашым ончыктымыштлан тауштен. Марий Эл вуйлатышын должностьышкыжо моло кандидат-влак нунын верч йӱкым пуышо-влаклан таум ойленыт да Александр Евстифеевым сеҥымыж дене саламленыт.
Кокымшо верыште — Альберт Федоров. Тудо 5,06 процент йӱкым поген. 3,48 процент дене кумшо верыште — Наталия Глущенко. Нылымше верыште – Валентина Злобина. Тудлан 1,76 процент сайлыше йӱкым пуэн. Кум кандидатат сайлымашым лийшымылан шотленыт.
Марий Элыште сайлаш 43,62 процент еҥ миен.
Л.Камалетдинова.
