Росгвардийын пашаеҥже-влак «Ветеранын пӧртшӧ воктене парад» патриот шӱлышан акцийым эртареныт. Кеч тений Сеҥымаш кечын парад лийын огыл гынат, сарын участникше, вневедомственный охранын ветеранже, отставкыште милицийын полковникше Петр Кузьмич Мельников деке тудо мӧҥгышкыжӧ «миен». Парадым веле огыл, концертымат ончен кертын.
Петр Мельников 1942 ийыште 17 ияшак военкматыш армийыш налышт манын йодын миен. А тулеч ончыч, тудо палисадникыштыже тумо озымым шынден улмаш. Сандене армийыш кайымыж годым шонен: тумыжо сайын илана гын, тудат илен лектеш, сар гыч таза пӧртылеш.
Петр Кузьмичым эн ончыч снайпер-влакым ямдылыме школыш колтат. А тылеч вара Сталинград воктенысе кредалмашке колтышаш улыт улмаш. Но пӱрымаш тудым Дальний Востокыш наҥгаен, япон самурай-влак дене кредалаш логалын. Тунам тудо пулемёт взодын командиржын полышкалышыже лийын…
Сеҥымаш нерген уверым Петр Кузьмич 9 майыште 4 шагат эрдене пален налын. Дневальный «Ура! Сеҥенна!» манын кычкыралын. Но Мельниковлан сар вигак пытен огыл. Тудо эше эрвелне кужу жаплан кучалтын, Китайыште, Йӱдвел Корейыште кредалын. 1945 ий 7 ноябрьыште 20 ийыш тошкалше Петр Мельников КНДР-ын лидерже Ким Ир Сенын кидше гыч «За освобождение Кореи» медальымат налын.
Полицийын лейтенантше Михаил Ермашов сарын участникше лӱмеш сар жапысе муро-влакым йоҥгалтарен, пошкудо-влакат саламлымашке ушненыт. Самоизоляций режимым эскермылан кӧра саламлымаш дистанционный лийын гынат, ветеранын кумылжым налын кертыныт. Росгвардийын Марий Элысе управленийжын начальникшын алмаштышыже Рамиль Аюпов ветеранлан национальный гвардийын тӱрло кӱкшытан вуйлатышыже-влакын, тыгак Марий Эл Республик вуйлатышын шарнымашан пӧлекше-вакым кучыктен.
С.НОСОВА
