«Экологий» национальный проект кышкарыште Марий Элыште «Ойыртемалтше вӱд объект-влакым аралымаш» регионысо проектым илышыш умбакыже шыҥдарат.
Мутлан, 2021-2022 ийлаште Оршанке районысо Изи Кугунур воктене Ошла эҥерын вӱд корныжым эрыкташ проект-смете документацийым ямдылышаш улыт. А пашажым 2023-2024 ийлаште шукташ палемдыме. Ты объект дене Оршанке посёлкышто, Изи Кугунурышто, Марковышто илыше калык пайдалана. Палемдыме паша шукталтеш гын, эҥер чыла шотыштат палынак яндарештеш, ойлат эколог-влак. Мартыште ты шотышто проектым илышыш шыҥдарышашлык организаций («МОФ ГТК-ГРУПП» ООО) дене кугыжаныш контрактым ыштыме. Кызыт вӱд объектыште инженер-влак пашам ыштат.
С.Носова.
