Юл кундем федерал округышто Кугу Отечественный сарыште сеҥымылан 75 ий темме лӱмеш кугу «Мемнан сеҥымаш кечына» акций кая.
Тудо Россий президентын Юл кундем федерал округысо полномочный представительжын аппаратшын темлымыж почеш эртаралтеш. Акций жапыште регионлаште илыше-влак чылан пырля шинчавӱд йӧре вашлийме пайрем нерген чапланыше мурым мурат.
А теҥгече, 26 апрельыште муро марафоныш Марий Эл ушнен.
— Мордовий деч вара эстафетым Марий Эл налын. Мемнан республикыштат тиде акцийыш ушнаш кумылан-влак моткоч шукын лийыныт, но тиде пашам ме Эшпай лӱмеш Марий кугыжаныш филармоний пеленысе усталык коллектив-влаклан ӱшаненна.
«День Победы» (Сеҥымаш кече») мурым «Марий кундем» калык семӱзгар оркестрын шоктымыж почеш А.И.Искандаров лӱмеш Марий кугыжаныш капеллын артистше ден ӱжмӧ солист-влак марла да рушла йоҥгалтареныт.
— Тыгай проектыш ушнымо дене ме ветеранна-влаклан тауштена, вет нуно шкеныштым чаманыде, илаш-колаш сӧй пасушто кредалыныт, немыч тӱшкам кырен шалатеныт да элышкына Сеҥымашым конденыт, — ойлен Марий Элын сулло артистше, «Марий кундем» калык семӱзгар оркестрын музыкантше Елена Моржанаева.
Коллектив-влакын мурымыштым Сеҥымаш паркыште, Курымашлык тул да Воин чап монумент, Благовещений башне воктене видеош войзеныт.
Марий Элыште ты проектым кузе эртарен колтышаш нерген сценарийым ямдылымаште моткоч шукын тыршеныт. Нунын коклаште республикысе тӱвыра, савыктыш да калык паша шотышто министр Константин Ивановат лийын.
Ушештарена, марафонысо муро клип-влакым соцсетьлаште да ютюбышто #песнипобедыПФО #нашденьпобеды хэштег-влак дене муаш лиеш. Муро-влак тӱрлӧ йылме дене радиостанийлаштат йоҥгалташ тӱҥалыт.
А.БАЙКОВА
