Пайрем-влак лишемыт. 23 февраль да 8 март вашеш «Мом пӧлеклаш?» йодыш икымше верыш лектеш. Сандене лудшына-влак коклаште нунын пӧлек шотеш мом налаш шонымышт нерген йодыштмашым эртарышна.
Владимир Виноградов, Советский район:
— Айдемын койышыжым, кумылжым шотыш налман. Тидын годым тудын акше тӱҥ огыл.
Александр Ямбаев, Волжский район:
— Лишыл еҥ, куандараш шонен, кеч-мом кучыкта гынат, сай. Саламлымаш мут денат чоным ырыкташ лиеш.
Денис Михайлов, Морко район:
— Ачамландым аралыме кечын ме эн ондак поро шомакым вучена. Бритве да носки деч чотрак, шкешотан, уло чон пыштен ыштыме пӧлеклан, йывыртена.
Святослав Ямаев, Пошкырт кундем:
— Пачер але машиналан иктат тореш ок лий, шонем (воштылеш).
Диана Захарова, Морко район:
— Кампетке, шоколад да иктаж шарнымашеш кодшо арверлан куанем ыле. Тиде шергаш, подвеске але открытке лийын кертеш. Молан тыге? Мый шере кочкышым пеш йӧратем, да адакше тиде кече деч иктаж шарнымаш кодшо, шонем. Мутлан, шергашым чиет, да вигак пайрем, пӧлеклыше айдеме ушыш пурат.
Ирина Салтыкова, Курыкмарий район:
— Вигак каласаш йӧсӧ. Мылам, Юл кундем федерал округым кумданрак ужаш манын, изирак путёвкым кучыктат гын, пеш сай ыле.
Елена Бачурина, Йошкар-Ола:
— Пӧлек пайдале лийшаш. Мый спорт дене кылым кучем. Пел илышем спортзалыштак эрта. Садлан у спорт формым иктаж кӧ деч вучем, вет чыла вереат мотор лийме шуэш. Тыгак кажне ӱдыр семынак пеледышым вучем.
Мария Архипова, Морко район:
— Мый авамлан телефоным налнем, тидыже кӱлешан шонем. Да эше пеледыш аршаш дене авамымат, шкемымат куандарынем. 8-ше мартыште, ӱдырамаш-влакым саламлыме годым, шке нергенат мондыман огыл.
О.МОШКИНА
