7-13 июльышто Ялта олаште шочмо йылмым (тышке рушат пура) туныктышо-влакын Кеҥежымсе тӱнямбал школышт лийын. Тушто Марий Эл гыч профессионал мастарлыкым И.С.Палантай лӱмеш тӱвыра да сымыктыш колледжын Сымыктыш национальный гимназийыштыже марий йылмым да литературым, руш йылмым да литературым туныктышо Лидия Иксанова ден Курыкмарий районысо Йоласал кыдалаш общеобразовательный школышто курыкмарий йылме да литератур дене шинчымашым пуышо педагог Татьяна Данилова (снимкыште) ончыктеныт.
Тыгай мероприятийын тӱҥ шонымашыже – шочмо йылмым туныктышо-влакын моштымашыштым вияҥдаш, икте-весылан паша опытым ончыкташ да тыге шуко тӱвыран кумыдыкышто калык-влак кокласе кылым пеҥгыдемдаш.
Кеҥежымсе школышто Россий Федерацийын 20 субъектше гыч 40 педагог чумырген, нунын коклаште Беларусь Республик, Донецк Калык Республик гыч образований пашаеҥ-влак лийыныт. Кажныжлан сертификатым кучыктеныт.
Г.КОЖЕВНИКОВА
Фотом Марий Эл Образований да науко министерстве гыч налме
