Пытартыш жапыште Марий Элын Тазалыкым аралыме министерствышкыже да тӱшка увер информаций средствылашке Семёновка посёлкышто илыше-влак деч верысе амбулаторийын пашаж шотышто йодыш-влак пурат. Калыкыште тиде медицине тӧнежым петырыме нерген мут коштеш.
– Семёновка врач амбулатрийым петыраш кӱлмӧ але лийме нерген шоналтымат огыл, – манеш Йошкар-Оласе 2-шо №-ан поликлиникын тӱҥ врачше В.Кузнецов. – Тӧнежым 2012 ийыште мемнан поликлиникыш пеҥгыдемдышт. Тидын дене Семёновка посёлкышто илыше-влаклан нимогай вашталтыш ыш лий. Тылеч посна ме акушерско-гинекологический, неврологический полышым пуаш лицензийым нална, да амбулаторийыште акушер-гинеколог ден невролог пашам ышташ тӱҥальыч. Нине специалист «Ялысе доктор» федеральный программым илышыш пуртымо кышкарыште толыныт, вич ий пашам ыштыме деч вара каеныт. Должность-влакым утыктарыме огыл, сандене нине профиль дене лекше специалист-шамычым вигак амбулаторийыш пашам ышташ колтена.
Амбулаторийыште пеш тошто аппарат дене пашам ыштыше ультразвуковой диагностике врач лийын. Тӧнежым поликлиникыш ушымо деч вара тудо паша гыч кайыш. Аппаратым списатлаш логале, молан манаш гын тудо олмыкташ лийдымыш савырнен ыле. Кызыт Семёновка посёлкышто илыше-влак УЗИ-шымлымашым терапевтын направленийже почеш Йошкар-Оласе 2-шо №-ан поликлиникыште уто нелылык деч посна эртен кертыт.
Амбулаторий гыч тошто флюорографымат кораҥдыме – тудо илыме пӧртыштӧ верланен да лӱдыкшыдымылык йодмашлан келшен толын огыл. Рентген аппаратым тӧнеж пелен чоҥымо оралтыш вераҥдыме, кажне кечын огыл гынат, пашам ышта.
Лабораторийыште чыла шымлымашым тичмашын эртарат. Вӱрым амбулаторийыште налыт, поликлиникыште шымлат, результатым мӧҥгеш колтат.
Медицине полыш кумдаҥын толеш: поликлиникыште колопроктолог, травматолог-ортопед да онколог пашам ышташ тӱҥалыныт.
– Тазалыкым аралыме министерстве Семёновка врач амбулаторийым петырыме шотышто нимом палемден огыл. Россий Федераций Минздравсоцразвитийын кӱштымыж почеш, врач амбулаторий-влакын пашам ворандарыме правилыштым пеҥгыдемдыме, ты шотыштак – штат нормативым да тӧнежым технике дене шыҥдарымым. Стандарт дене келшышын, амбулаторийыште УЗИ аппарат лийшаш огыл. Семёновка посёлкышто илыше-влак консультаций сынан медицине полышым 2-шо №-ан поликлиникыште рӱдоласе калык дене иктӧр налын кертыт, – рашемда Тазалыкым аралыме министерствын лечебно-профилактический полыш пӧлкан начальникше И.Ходырева.
М.ИВАНОВА.
