«Лӱдыкшыдымӧ да сай качестван автомобиль корно» нацпроектым илышыш пуртымо дене Марий Эл регион-лидер-влак радамыш пурен.
Тидын нерген РФ транспорт министрын алмаштышыже Андрей Костюк селекторный совещанийыште каласен. Тудым субъект вуйлатыше-влак дене видеоконференций йӧн дене РФ правительстве председательын алмаштышыже Марат Хуснуллин эртарен.
Андрей Костюкын палдарымыж почеш, «Лӱдыкшыдымӧ да сай качестван автомобиль корно» нацпроектым илышыш пуртымо дене келшышын, могай пашам тений ыштен шукташ лийме гын, чылажымат жапыштыже мучашлен шукташ палемдалтеш. Южо показатель шотыштыжо пашам эсогыл ончылгочат мучашлат.
— Ӱмаште дене таҥастарымаште, тений ситуаций саем толеш. 2019 ийыште улыжат 10 лидер да тынарак аутсайдер лийыныт. А тачылан лидер-субъект-шамычын радамышт шукемын. Тушко Адыгей, Калуга, Новгородский, Нижегородский, Новосибирск, Оренбург, Саратов областьла, Ставропольский край, Башкортостан ден Марий Эл республик-влак ешаралтыныт. Ме пашам шуктымым да ойырымо оксам кучылтмым веле огыл аклена. Тыгак эн сай технологий-влак дене пайдаланыме, корнын лӱдыкшыдымӧ улмыжо, тиде ситуацийым саемдышашлан мероприятий-влакым эртарыме, икмыняр моло шотыш налалтыт. Регион вуйлатыше-влаклан таум каласынем да вес ийынат пашам тыгак шуяш тыланынем, — ойлен Андрей Костюк.
Тиде нацпроектым илышыш пурташ тений Марий Элыште 3,4 млрд. теҥгем кучылташ палемдыме. Республиканский да верысе корнылам шотыш кондаш 47 контрактым ыштыме. Идалык мучаш марте кундемыштына 170 утла км автомобиль корным ачалышаш улыт. Тидыже ӱмашсе деч 35 километрлан шукырак. Тачысе кечылан 158 километржым ыштен шуктымо.
Тылеч посна Йошкар-Олаште Киров ден Строитель урем-влак ушнымаште магистраль корным чоҥымо паша кая. Тидлан тений 750 млн. теҥгем кучылташ палемдыме. Тышеч 490 млн. теҥгеже – федерал бюджет гыч, 260 млн. теҥге – РФ правительствын резерв фондшо гыч.
Автомобиль корно-влак кызытсе жапын йодмашыж дене келшыше да вер гыч верыш куснылшо лабораторийын приниматлыме диагностикыштым эртат. Тыгак кугу тӱткыш кӱлеш документ-влакым жапыштыже ямдылымылан ойыралтеш.
Кызыт 2021-2022 ийлаште корным чоҥаш да ачалыме пашам шукташ контракт-влак ышталтыт. Шушаш ийыште 1 миллиардат 800 миллион утла
теҥгелан контракт-влак пеҥгыдемдалтыныт. Тидыже 64 % лиеш. 2022 ийлан 14% объект-влак шотышто контракт-влак ышталтыныт.
Нацпроектым илышыш пуртымо дене кылдалтше пашам палемдыме жап деч ончыч шукташ задачым Марий Эл вуйлатыше Александр Евстифеев шынден. Молан манаш гын тиде планым эртарен шукташ, тыге гын, шотыш кондымо автомобиль корно-влакын чотыштым шукемдаш йӧным ышта.
Марий Эл Республикым вуйлатышын организаций да
аналитике виктемжын уверже-влак негызеш
Л.КАМАЛЕТДИНОВА ямдылен
