УВЕР ЙОГЫН

Марий йоча-влак марий муро дене куандареныт

19-21 майыште «Челентано» усталык ушем Йошкар-Олаште йоча да самырык-влаклан, тыгак кугурак-шамычланат «Пятый элемент» фестиваль-конкурсым эртарен. Тушко Киров, Чебоксар, Новочебоксарск, Ульяновск, Набережные Челны, Нижний Новгород олала да Марий Эл Республикысе ятыр ола ден посёлко гыч чылаже кок тӱжем утла участник ушнен.

Марий тӱвыра рӱдер пеленсе «Юкече» йоча студий «Пычыр-пучыр-пычырик» мурым йоҥгалтарен (мутшо Л.Иксанован, семже С.Яндукован) да III степенян диплом дене палемдалтын.

Тиддеч посна конкурсышто «У муро» студийын солистше-влак Александр Мамаев ден Ольга Якимова мастарлыкым ончыктеныт, лауреат лӱмым налыныт.

«Лира» искусство школын тунемшыже-шамычат сеҥыше радамыште улыт.

Тидымат палемдыман, «Юкечым»  да тудын вуйлатышыже Светлана Яндуковам жюри председатель Лариса Сёмина Суздальыште эртаралташ тӱҥалше «Золотые врата» конкурсыш ӱжын.

А.Байкова.

Опубликовать в Одноклассники

Добавить комментарий