1 декабрь гыч Йошкар-Олаште «Я.Крастынь – Звёздный микрорайон» 21-ше №-ан автобус маршрут дене коштын кертдыме-влакым кондыштараш йӧн лектын.
Кокла классан ик транспорт средствым моло пассажир дене пырля эше инвалид-шамычым шупшыкташ келыштарыме. Тудын паша графикше: 6 гыч 22 шагат йотке. Автобус кажне 80 минут гыч кудалыштеш.
Мэрийын пресс-службыжын увертарымыж почеш, ола администраций пассажирым шупшыктышо транспорт оза-влак дене «ГАЗель»-ым «ПАЗ» дене алмаштыме да микроавтобусыш инвалид-влакым шупшыкташ йӧным ыштыше оборудованийым шыҥдарыме шотышто чак мутлана.
М.ИВАНОВА.
