Шушаш рушарнян, 12 сентябрьыште, Шернур районысо Кукнур села черетан пайремышкыже вуча.
Эртыше кечылаште оргкомитетыште кутырен келшыме почеш, молгунамсе семынак тудо Кукнур волостьын кубокшо верч мини-футбол да тыгак баскетбол дене модмаш дене тӱҥалеш. Тудо ынде 28-ше гана эртаралтеш. Спорт пайремым почмо деч вара верысе калыкат, уна-шамычат Шернур районлан 100 ий темме лӱмеш 100 метрым тӱшкан куржыт. Тыгак Кукнур ял шотан илем кумдыкыш пурышо ял-влак коклаште куштылго атлетике дене эстафете лиеш. Кирам нӧлтымаште ынде латкандашымше гана вийыштым тергаш кумылан-влакымат вучат. Ты турнир ынде таҥасымашын спонсоржо Юрий Зоновым шарныме лӱмеш эрта.
«Пелед, тӱзлане, шочмо кундемем» пайрем концертым Шернур тӱвыра да каныме полатын пашаеҥышт ден гармоньчо да мурызо Сергей Пакеев сӧрастарат.
Тиде кечынак селаште йоча модмо площадкым почыт.
Организатор-влак пайремыш толшо-шамычым кундемыштына шучко чер ваштареш кучедалме режимым шотыш налаш йодыт.
С.Пехметова
Д.Речкинын фотожо
