27 май – библиотекарьын кечыже. Тиде пайрем вашеш С.Чавайн лӱмеш калыкле книгагудын лудмо рӱдерын калыкле литератур зал секторыштыжо тыршыше самырык ӱдыр Анастасия Галиева дене вашлийын мутланышна.
– Настя, тыйын шонымаште XXI курымысо книгагудо пашаеҥ могай лийшаш?
– Книгагудо книгам веле огыл, тыгак у да оҥай мероприятий-влакым темла. Садлан нуным эртарен колташ эре ямде лийман. Тидланже усталыкат кӱлеш. Еҥ-влак дене вашкылым ыштен моштыман.
Шовыч дене вӱдылалтше илалше ӱдырамаш, чурийжым шинчалык сӧрастара – теве тыге шукынжо библиотекарь нерген шона. Но книгалан чӱчкыдын коштшыжо пала: кызытсе книгагудо пашаеҥ жап дене тӧр ошкылеш. IT-технологий-влак денат моштен пайдалана. Ийгот могырым ончалаш гын, ты профессийыште шагал огыл самырык-влак тыршат.
Ончыч книгагудышто шып шинчыман ыле гын, кызыт книгагудын пӧлкаже-влакым коворкинг рӱдер семын кучылташ лиеш.
– Книгагудышто мероприятий-влак эртаралтме нерген увер чӱчкыдын коеш? Тугеже тендан дене весела?
– Тыге. Кажне кечын манме гаяк лудшо-влак дене чумырген иктаж вашлиймашым, акцийым эртарена. Ончер-влак чӱчкыдын пашам ыштат. Икманаш – илыш «шолеш».
Теве шукерте огыл Йошкар-Оласе техникум ден колледжыште тунемше-влак «Александр Невскийын кердыжым кычалмаш» квестыш толыныт ыле. Тушто, икмыняр командылан пайлалтын, писылыкыштым, уш-акылыштым тергеныт.
Фотосӱретым ышташ манын мотор верым кычалше-влакланат пурен лекташ пеш пайдале. Ты тӧнеж кумдык мучко фотом ышташ лӱмын вер-влакым келыштарыме.
– Кызыт С.Чавайн лӱмеш книгагудысо библиотекарь коклаште «М.А.Я.К. Молодые. Активные. Яркие. Креативные» конкурс кая. Таҥасымашын икмыняр йыжыҥже шеҥгелан кодын. Ямдылалтме сомылет дене палдаре?
– Тиде конкурс мартыштак тӱҥалын. Тушко 7 еҥ ушнымо. Икымше этапыште шке ден палдарыше видеом ямдылыме, кокымшышто – кум книгам ойырен налын лудшылан темлыме. Мый XXI курымысо йоча-влаклан келшен толшо произведений-влакым ямдыленам. Видеом ончышо кокла гыч иктаж-кӧжӧ нуным кидыш кучен лудешак манын ӱшанем. Кумшо этаплан онлайн ончерым ямдылаш йодыныт.
27 майыште библиотекарьын кечыжын ты конкурсышто сеҥыше-влакын лӱмышт дене палдарат. Уло кумылын чыладамат ты мероприятийыш вучена.
– Книгагудышто тыршыше-влак пеш чулым улыт. Тидыже социал лаштыкдам ончал лекмеке раш палдырна.
– Мемнан тӱҥ шонымашна – еҥ-влакым книгам лудаш шӱмаҥдаш. Самырык-влак деке лишкырак лияш манын, тӱрлӧ социал кыл-влакым кучылтына. Теве шукерте огыл ик тӱҥ площадкылан Instagram шотлалтеш ыле гын, кызыт шукынжо TikTok-ыш кусненыт. Тушко куштымашан, мурымашан, мыскаран кӱчык видео-влакым луктедат. Меат кечылан ик роликым лукташ тыршена. Шукын ончат – 60 тӱжем марте погына.
TikTok-лан кӧра лудшыда-влакат ешаралтыныт. Лаштыкнам тӱрлӧ кундемыште илыше-влак ончат. Теве Чебоксар гыч ик туныктышо Йошкар-Олаш толам гын, книгагудыш пурыде ом кай, манын серышым возен колтен.
– Хейтерда (удам возышо) улыт?
– Уке манаш лиеш. Лач южгунам иктаж куштымашан видео йымалан «ик семын огыда тарваныл» манын возат. Поро серышым колтышыжо шукынрак улыт.
– Могай книга тыйын шинчаончалтышет вашталтен?
– Лудмо произведений кокла гыч эн сайлан Стив Харвийын «Пӧръеҥ гай шоно, ӱдырамаш гай ыште» книгажым шотлем. Тудо психологий могырым пӧръеҥ койшым умылаш полша. Ӱдыр-влак, пелашда дене пеҥгыде ваш-кылым ыштынеда гын – лудса.
– Пашат вораҥ шогыжо!
– Тау!
О.МОШКИНА мутланен
