«Марий Элын Идалыкын туныктышыжо-2021», «Марий Элын Идалыкын воспитательже-2021» да «Марий йылмым эн сайын туныктышо-2021» республик конкурслам торжественно петырыме годым Марий Эл образований да науко министрын алмаштышыже Нонна Антоничева каласен.
Тенийысе профессионал мастарлыкым тергыме таҥасымашын очный этапше, йӱла почеш ӱмаште «Марий Эл Республикын Идалыкын туныктышыжо-2021» лӱмым сеҥен налше педагог Ольга Костюнинан туныктымо верыштыже – Советский посёлкысо 3-шо №-ан кыдалаш школышто – 20 -23 апрельыште эртеныт. Самырык тукымлан образованийым да воспитанийым пуымо пашаште усталыкым республик кӱкшытыштӧ чылаже 15 еҥ терген.
20-22 апрельыште туныктышо ден воспитатель-влак мастер-классым ончыктеныт, урокым, тыгак урок деч ӧрдыжсӧ мероприятийым, ача-ава-влаклан семинарым эртареныт, образовательный проектышт дене палдареныт. Тыге Советский посёлкысо 3-шо №-ан школ деч посна конкурс площадкыш Алексеевский да Ӱшнур школ-шамыч савырненыт, а воспитатель-влак йоча-шамыч дене педагогический мероприятийымСоветский посёлкысо 1-ше №-ан «Сказка» йочасадыште эртареныт.
Таҥасымашын пытартыш кечынже 9 эн уста туныктышо ден воспитательлан пытартыш тергымаш – «Йыргешке ӱстел» – лийын. Лауреат-влакын лӱмышт: «Идалыкын туныктышыжо-2021» конкурсышто – Е.Васенёва (Йошкар-Оласе Семёновка селасе 21-ше номеран школ, биологийым туныктышо), Э.Ветлужских (Марий Турек посёлкысо кыдалаш школ, историйым, обществознанийым да экономикым туныктышо), Е.Романова (Медведево район Краснооктябрьский школ, тӱҥалтыш классым туныктышо); «Идалыкын воспитательже-2021» конкурсышто – Ю.Белоусова (Волжск ола, 17-ше №-ан «Дюймовочка» йочасад), К.Бурменская (Йошкар-Ола, 35-ше №-ан йочасад), С.Никифорова (Медведево район, Знаменский посёлкысо йочасад); «Марий йылмым эн сайын туныктышо-2021» конкурсышто – Н.Голубкина (Моркысо 2-шо №-ан школ, марий йылмым туныктышо), Л.Гришкина (Советский район Кельмаксола школышто, тӱҥалтыш классым туныктышо), К.Плотникова (Марий Турек районысо Сардаял школ, марий йылмым да литературым туныктышо))
«Йыргешке ӱстелым» Советский посёлкысо 3-шо №-ан школын директоржо Сергей Александрович Новосёлов шкежак эртарен. Кажныжлан икмыняр йодышлан вашешташ кӱлын, нуныжо, мутат уке, туныктымо паша, тунемше, ача-ава дене кылдалтше лийыныт: мутлан, «Йочан кок авторитетше уло – ача-ава да туныктышо. Нунын шонымашышт икгай огыл годым мом ыштыман?», «Тачысе туныктышо могай лийшаш?», «Кӱшыл образованийын акше: таче тудо вашталтын але уке?», «Цифран технологий: робот айдемым вашталтен кертеш мо?», «Молан тыланда шучкын чучын кертеш?» да молат. Каласыман, конкурсант-влаклан тӱҥ шотышто йодышым эртыше ийласе республик кӱкшытан тыгаяк конкурслаште сеҥыше-влак, тыгак молат пуэныт.
Чыла тиде 23 апрельыште кечывал деч ончыч лийын гын, сеҥыше-влакым торжественно саламлыме татым кечывал деч вара эртараш палемденыт, сандене ты коклаште уна да участник-влакым шокшын вашлийше Советский посёлкысо 3-шо №-ан школ дене палыме лияш йӧн лекте. Таче тиде общеобразовательный организаций республикыште ик эн ончыл тунемме верлан шотлалтеш. Тыште 991 икшыве шинчымашым налеш, нунын дене 61 педагог пашам ышта. 2020 ийыште школлан 25 ий темын, ӱмаштак «Образований» национальный проектын «Кызытсе школ» федерал проектше дене келшышын «Кушмо точко» образовательный рӱдер почылтын. 2007 ий гыч тудо ресурс рӱдер статусанлан шотлалтеш. Школ нерген кумданрак газетна гоч варарак палдарена, а кызытеш чыланат – актовый залыш. Тушто конкурс-влакын участникыштым да сеҥыше-влакым саламлашат тӱҥалыныт. Эн ончычак поро мутым Россий Федерацийысе калык образований да науко пашаеҥ-влакын профсоюзыштын республикысе комитетшын председательжын алмаштышыже Надежда Летова каласен.
Тудо, йӱла почеш, кажне номинацийыште лауреат-влаклан окса грантым кучыктен, тиде гана тыгай пӧлек дене палемдалтыныт: Т.Александрова лӱмеш именной премийлан сертификат дене – Э.Ветлужских (Марий Турек посёлкысо кыдалаш школ), И.Глушков лӱмеш премийлан сертификат дене – С.Никифорова (Медведево район Знаменский посёлкысо йочасад), Л.Васикова лӱмеш премийлан сертификат дене – Л.Гришкина (Советский район Кельмаксола школ). Эн самырык участниклан, Марий Турек районысо Сардаял школын туныктышыжо К.Плотниковалан, «Таир-2021» педагогический форумыш путёвкым кучыктен. Вес лаурет-влаклан Е.Васенёвалан (Йошкар-Оласе Семёновка селасе 21-ше №-ан школ) «Ваштар курык» санаторийыш, а К.Бурменскаялан (Йошкар-Оласе 35-ше №-ан йочасад) «Яльчик» пансионатыш путёвкым пуэныт. Изин-кугун вучымо татат толын шуын. Сценыште сеҥыше-влакын лӱмыштым Марий Эл образований да науко министрын алмаштышыже Н.Антоничева ден Марий образований институтын ректоржо, жюрин председательже Л.Овчинникова увертарышт. Нунын лӱмышт:
«Марий Элын Идалыкын туныктышыжо-2021» – Елена Романова (Медведево районысо Краснооктябрьский школышто тӱҥалтыш классым туныктышо);
«Марий йылмым эн сайын туныктышо-2021» – Надежда Голубкина (Моркысо 1-ше номеран школышто марий йылмым туныктышо);
«Марий Элын Идалыкын воспитательже-2021» – Юлия Белоусова (Волжск оласе 17-ше №-ан «Дюймовочка» йочасад)
Марий Элын чапшым нуно Россий кӱкшытыштӧ аралаш тӱҥалыт. Тений «Идалыкын туныктышыжо-2021» Ростов-на-Дону олаште лиеш, лач тушто ӱмаште тыгаяк конкурсын абсолютный сеҥышыже М.Гуров (Классический элитарный лицейыште математикым туныктышо) ила да пашам ышта.
Г.КОЖЕВНИКОВА
