Кодшо вӱргечын Йошкар-Ола изеҥер ден вӱдан вер-влакын серыштым эрыктыме шотышто «Российын вӱдшӧ» общероссийский акцийыш ушнен.
Акцийын икымше кечыже Ширяйково кунлемысе Изи Какшан серыште эртаралтын. Тушко эн ончыч Йошкар-Ола администрацийын экологий да пӱртӱс дене пайдаланыме комитетшын, Марий Элын Экологий лӱдыкшыдымылык, пӱртӱс дене пайдаланыме да калыкым аралыме департаментшын, Россий МЧС-ын Марий Элысе управленийжын, «Ола» МУП-ын, «Южный» ЖЭУК» АО-н еҥышт ушненыт. Нуно шкевуя орен кушшо изи пушеҥге ден вондерлам кораҥденыт, шагал огыл шӱкшакым поген луктыныт.
А. Андреев
