Йошкар-Ола воктенысе Нолько ялыште илыше марий шӱлышан тале пӧръеҥ Илья Андреев шке сурт-печыштыже Российын калык сӱретчыже Зосим Фёдорович Лаврентьевым шарныме лӱмеш галерейым почын.
Тудын кӧргышкыжӧ пурымеке, свежа пушеҥге пуш чоным куандара, а пырдыжыште улшо сӱрет радына-влак кумылым вӱчкат. Натюрморт, пӱртӱс сӱрет, портрет… Зосим Фёдоровичлан сӱретсымыктышын тӱрлӧ жанржат лишыл лийын.
Пурла велне – кугу гына радына. Тушто кум имне дене Илья Пророк «кудалеш». Чевер, кугу сӱретым Зосим Фёдорович шкеж деч ятыр ийлан изирак йолташыжын 60 ияш лӱмгечыжлан ямдылен шуктышаш улмаш. Но… Тудым вараже пелашыже возен шуктен.
– А тидым, пелашем ден когыньнам, 55 ияш лӱмгечемлан сӱретлен, – галерейыште сӱрет-влак дене палдара Илья Борисович. – Икмыняр ий ончыч Зосим Фёдорович ден Иван Михайлович Ямбердов Югорскышто выставкым эртарышт. Тушто лиймышт годым Зосим Фёдорович икмыняр сӱретым ямдылен. Мылам нуно моткоч келшеныт да вик тудын деч налынам.
Кумда зал покшелне – бильярд ӱстел. Тудын дене сӱретче поснак чот модаш йӧратен улмаш.
– Чаманаш кодеш, Зосим Фёдорович тидым ужын ыш шукто. Эх, шоналтем да… – кумылжо тодылалтме гай лие И.Андреевын. – Бильярдла модмем годым тудо эреак пеленем, шеҥгечын ончен шогымыжым шижам.
Илья Борисович Зосим Фёдорович дене палыме лиймыжым, чон почын мутланымыштым, ончыкылык нерген шонкалымыштым кызытат порын шарна да тунамсе жапшым пиалан пагытлан шотла…
!!! МАТЕРИАЛЫМ ТИЧМАШНЕК ГАЗЕТЫШТЕ ЛУДАШ ТЕМЛЕНА
АЛЕВТИНА БАЙКОВА
М.Скобелевын фотожо
